Goirizelaiak irabazi ditu EHUko errektoretzarako bozak, ozta-ozta

Boto ponderatuaren %52,25 lortuta gailendu zaio Iñaki Goirizelaia, orain artean errektoreorde izandakoa, Marisol Estebani Ikasleen parte-hartzea nabarmen handitu da; maiatzeko %3tik %14ra igo da

Azken egunotan eginiko aurreikuspenak zuzen ibili dira: oso berdinduta egon da bi errektoregaiek jasotako sostengua. Iñaki Goirizelaiari 5.416 lagunek eman diote botoa, eta Marisol Estebani, 4.350ek; boto ponderatuaren sistemara bihurtuta, aldiz, honakoak dira portzentajeak: botoen %52,25 Goirizelaiaren alde, eta %47,75 Estebanen alde. Parte-hartzeari dagokionez, maiatzekoa baino altuagoa izan da hautesle talde guztietan, baina bereziki ikasleen artean hazi da. Izan ere, maiatzean ikasleen %3k eman zuten botoa, eta oraingoan %14,11k.

Espero bezala, Marisol Esteban gailendu da irakasle eta ikertzaile doktore iraunkorren artean; boto ponderatuaren %51eko balioa duen taldean, hain justu ere. Dena den, aldea ez da oso handia izan: 837 doktorek eman diote botoa Estebani, eta 782k Goirizelaiari. Gainerako irakasle eta ikertzaileen artean nabarmen gailendu da ingeniaria: 1.001ek eman diote hari botoa, eta 708k, berriz, Estebani. Ikasleen multzoan ere alde handia egon da bi hautagaien artean: 3.024k bozkatu dute Goirizelaiaren hautagaitza, eta 2.192k, berriz, Estebanena.

AZPkoen artean aldaketa

Administrazio eta Zerbitzuetako Pertsonalaren (AZP) artean gertatu da aldaketarik esanguratsuena. Marisol Estebanek irabazi du, baina lau bozetako aldea besterik ez dio atera Goirizelaiari. Kolektibo horrek ezezko biribila eman zion Perez Iglesiasi maiatzean; bere hautagaitzaren aurkako botoak aldekoen ia bikoitza izan ziren orduan. Sei hilabeteren ondoren, ordea, Perez Iglesiasen kontrako botoa eragin zituzten auzi gehienak konponduta daude.

Marisol Estebanek irabazlea zoriondu eta segituan egin du alde, adierazpenik egin gabe. Euskal Herrirako Unibertsitatea Gure Helmuga plataformako kide Koldo Calladok, berriz, «positibotzat» jo du emaitza, haren ustez, unibertsitate komunitateak adierazi duelako «ez duela Estebanen egitasmo atzerakoiarekin bat egiten». Perez Iglesiasek zirrara handiz hartu ditu emaitzak, bere taldeko kide bati ez ezik, adiskide bati emango baitio lekukoa Errektoretzan. «Zorionak Iñaki, eta aurrera», esan dio. Hain zuzen, Perez Iglesiasentzako hitzak izan ditu Goirizelaiak: «Pertsona bati eskaini nahi diot hau bereziki. Azken sei hilabeteetan kritika asko jaso ditu, kritika bidegabeak, nire ustez. Juan Ignacio Perez, garaipen hau zurea da».

Emaitzen berri eman ondoren, jai giroa nagusitu da EHUko Leioako campuseko (Bizkaia) Areto Nagusian. Iñaki Goirizelaiaren bi pasioek, unibertsitateak eta dantzak, bat egin dute haren seme-alabek eskainitako omenaldian. Semeak aurreskua dantzatu dio, eta alabak lore eskaintza egin. Mungian (Bizkaia) zuzentzen duen dantza taldea utziko ez duela agindu du Goirizelaiak; errektore hautatu gisa lehenengo arin-arina dantzatu zuen bart.