Godoten esperoan daudenen hitzak eta dantzak

Beckett oinarri hartuta, dantza eta antzerki ikuskizuna aurkeztuko du gaur Iruñean Jose Lainez koreografoak

Abanguardiako ikuskizuna da berea, Lainezen hitzetan, eta bere gisa aritu dela dio. Aske. Becketten testuak taularatu beharrean, haren testuetatik «abiatutako irakurketa bat» da berea. «Emaitza? Ez dakit, eta berdin zait, nik oso ongi pasa dut lan honekin. Jendeak gustuko ez badu, haientzat okerrago».

Godoten Esperoan lana dago bere ikuskizunaren oinarria, baina Eleutheria, Fin de partie (jokoaren amaiera), Film izeneko lanetako eta zenbait antzezlan laburretako pertsonaiak ere ageri dira taula gainean. Errepide ertzean jarri ditu, horretarako, Godoten Esperoan laneko Vladimira -emakume bihurtu du bere lanean Vladimir Lainezek- eta Estragon pertsonaiak. Gunez aldatu ditu baina jatorrizko lanean bezala, zain pasatzen dute denbora.

Lanean aurkituko ditu pertsonaia horietariko lau ikusleak antzokira sartzerako. «Bainuetxe-geriatriko-zoroetxe baten moduko zerbait da dekorazioa, antzokiaren zutabeak ezkutatzen ez dituena, eta hor izango dira pertsonaiak lehen ikuslea sartzerako irriz, kantuan, oihuka...». Baita zain ere. «Agerralditik agerraldira Estragon agertokian esperoan gelditzea da ideia, hala, jendea heltzerako jadanik esperoan egongo da bera».

Arriskuaz eta haren beharraz

Hamaika dantzari, aktore eta aktore-dantzari izango dira agertokian Becketten hitzak antzezten eta Lainezek sorturiko urratsak dantzatzen. Lanaren arriskuaz aritu dira Angel Sagues eta Asun Abad aktoreak. Arriskuaz, eta beharraz. «Beckett eta dantza lotzea arriskutsua izan liteke, baina egin beharra zegoela uste dut», dio Saguesek. «Zinez uste dut ikusleak halako eskaintzak jasotzeko eskubidea duela».

Gaiarre Antzokiaren Fundazioaren eta Nafarroako Gobernuaren arteko hitzarmenari esker sortu du Beckett 5 Lainezek, eta hari esker ibiliko da hemendik aurrera Nafarroako Antzoki Sareko kultur etxeetan zehar.