Gipuzkoar dantzarien keinua

Kemen Dantza Taldeko hamabost dantzarik hiru eguneko ibilaldia bete zuten igandean gipuzkoako dantzak Iruñean aurkezteko

Hainbat liburu testutan azal-tzen den bezala, XIX. mendean Zaldibiako dantzariak oinez abiatu ziren Iruñeara bertako San Fermin jaietan dantzatzeko. Haiek gau bakar batean bete zuten bi herrien arteko tartea; irundarrek inongo presarik gabe hartu nahi izan zuten, horrela ere bideaz gozatzeko aukera eskuratuz. «Bost-sei ordu ematen genituen egunero oinez, beraz bagenuen bisitak egiteko eta argazkiak ateratzeko astia», zioen Kemeneko Patxi Pagolak, ekimena bultzatu duenetariko bat. «Orokorrean oso ondo pasa genuen bidean; eguraldi ona izan genuen eta ez genuen izan inolako gauza arrarorik: ez erorketarik ezta txorkatila bihurriturik ere». Bidean zehar sekulako paisaia ikusteko aukera izan zuten. «Baso oso potenteak daude eta orain, udazkenean, benetan politak ikusi genituen. Larunbatean, behelainoa izan genuen eta argazkian ikusten den bezala oso paisai politak geratu ziren, gainera, zerua argi eta eguzkitsua baikenuen».

Igandean, goiz jaiki

Parrandarik egiteko leku aproposena ez da mendia, beraz, Kemeneko ibiltariek ez zuten gaizki hartu igandean zertxobait goizago jeiki behar izana. «Aurreikusitakoa baina bi ordu gutxiago behar izan genituen azkenean ibilaldia betetzeko, baina, badaezpada, igandean goiz jaikitzea erabaki genuen».

Iruñean publizitate gutxi egin zioten bere saiakerari, baina, hala ere, ehun bat pertsona bildu ziren txistuaren soinuak deiturik, izan ere, «igande goizez jende mordoxka dabil beti Iruñeako alde zaharretik». Hamabost minutuko saioa eskaini zuten, hori bai, mendi botak kendu eta gero eta ekimen honetarako prestaturiko kamisetak jantzirik.

Igandean bertan bueltatu ziren, bazkaldu eta gero, eta atzoko eguna ahal zen moduan indarrak erreparatzen eman zuten nahiz eta lana egin behar. «Batzuk ohitura falta, besteek katarroa; denok izan dugu astelehen gogorra».

Eguraldia lagun izan zuten Kemeneko hamabost abenturazaleek, bai bideaz gozatzeko baita Iruñean dantza egiteko ere.