Foruen plaza dantza giroan

Aurten emakumezko batek hartu du lehen aldiz ikurrina, agintariena dantzan

Iruñeko lehen suziriaren ondoren, festa giroa izan zen nonahi. Txupinazoa bota eta ordu eta erdi geroago, Iruñerriko dantza taldeek Foruen plazako giroa alaitu zuten gaitero eta fanfarrearen laguntzarekin batera.

Aurtengo ekitaldian agintariena dantzak berezitasun nabaria izan du; izan ere, 30 urtetan lehen aldiz, emakumezko batek -Oberena dantza taldeko kide batek- ibili zuen ikurrina airean. Iruñerriko hainbat dantza taldek parte hartu zuten jaialdian, besteak beste, Ardantzetak (Noain), Amaiurrek, Muthiko alaiak taldeak, Oberenak, Dugunak, Iruña taldeak, Mikelatz dantza taldeak eta Txori Zuri dantza taldeak (Berriozar).

Iruñerriko berrehun dantzari inguruk parte hartu zuten atzo eguerdian Foruen plazako ikuskizunean, eta sanferminetako lehen egunari giro euskaltzalea eman zioten zinez.

Ikurrinari eginiko agurrarekin eta agintariena dantzarekin hasi zen jaialdia. Txalo zaparrada jaso zuten Iruñerriko dantzariek saioa hasi bezain laster, eta gero eta jende gehiago bildu zen Foruen plazara. Arabako Eltziego dantza izan zen, ostera, protagonista. Dantza taldeetako neskak izan ziren partaide nagusiak, eta katximorro pertsonaia izan zuten gidari.

Uztai-dantza, brokel-dantza eta zortzikoa izan ziren hurrengo dantzak, eta, orduan, berriz, mutilak izan ziren uztaien astinduen erakusle. Iruñeko gaiteroen laguntzarekin batera, Zangozako jota zaharra izan zen azken-aurreko dantza; larrain-dantzarekin bukatu zen jaialdia. Ikusleen partaidetza nabarmena izan zen, batez ere larrain-dantzan. Finean, Foruen plaza jendez beteta egon zen eguerdi partean.

Dantzarien emozioa

Ikusleen partaidetza nabarmena izan zen euskal dantzen erakustaldian, baina, aldi berean, giro aparta antzeman zen dantzarien artean ere. Iruñerriko taldeetako kideek zirrara berezia sentitu zutela ezagun zuten aurpegietan. «Uztailaren 6a aparteko xarma duen eguna da», zioen Ardantzeta taldeko dantzari batek. Horrez gain, urduritasuna nabari zitekeen euren aurpegietan, aurreko egunetan bakardadean entseatutakoaren emaitza ikusteko irrikan baitzeuden.

Halere, uztaileko eguzkiak ematen duen beroagatik itota ziren dantzariak, eta sarritan ur botila freskoak ibili ziren bueltan dantzarien inguruan. «Bero handia pasatzen dugu, batez ere jantzi lodien ondorioz», zioen Ardantzeta taldeko beste kide batek. Dena dela, beroari aurre eginez, gogo handiz aritu ziren euskal kulturaren zati bat erakusten.