Ezpeizen abiatuko dira Zuberoako maskaradak

Igande honetan, urtarrilak 22, abiatuko da Zuberoan maskaraden sasoia-edo deitu daitekeena. Apirilaren 30era arte, hiru hilabete luzez, 15 herrik hartuko dute herrialde horrek bere-berea duen antzerki mota. Kaleko antzerkia, hain zuzen, dantza eta kantua biltzen dituena, inauteriari lotua. Aurten Pettarra eskualdeko Xiberoko Jauna elkarteko neska-mutil gazteen gain dago maskaraden antolaketa. Zuberoa iparraldean kokatutako eskualdea Ezpeize-Ündürein, Ürrüstoi-Larrabile, Ainharbe, Sarrikota, Onizepea eta Mitikilek osatzen dute, eta aurreneko herri horretan, Ezpeizen, egingo da bihar lehen emanaldia.

Barrikadekin hasiko da eguna 10:00etan, eta maskaradak 15:30ean izango dira. Bertaratzekotan, edo beste egunen batean bertaratzeko asmorik izatekotan, oso-oso komenigarria da, ezinbestekoa ‘manexkeria’ hangiegirik ez egiteko, Aritz Ibañez Lusarretak dantzan.eus atarian argitaratutako gida moduko hau irakurtzea. 2014koa da, baina ez du interes eta gaurkotasun izpirik galdu.

Hurrengo asteetan, apirilaren 30era arte, honeko egitarau honen arabera ibiliko dira maskaradak Zuberoan barrena:

Urtarrilak 22, igandea: Ezpeize

Urtarrilak 29, igandea: Gotaine

Otsailak 5, igandea: Altzai-Lakarri

Otsailak 12, igandea: Altzürükü

Otsailak 19, igandea: Müskildi

Otsailak 26, igandea: Pagola

Martxoak 4, larunbata: Maule

Martxoak 11, larunbata: Idauze

Martxoak 18, larunbata: Iruri-Zalgize

Martxoak 26, igandea: Urdiñarbe

Apirilak 2, igandea: Larraine

Apirilak 9, igandea: Hoki

Apirilak 16, igandea: Barkoxe

Apirilak 23, igandea: Gamere

Apirilak 30, igandea: Ürrüstoï

Gero, maiatzean, Tolosaldean izango da aurten errejenta lanetan Allande Davant eta dantza irakasle Margot Fauri dituen ikuskizunaren emanaldi bat bertatik bertara ikusteko aukera.