'Errimak oinetan' ikuskizunak proposamen guztiz berria dakar

Ordubete inguruko ikuskizuna da eta larunbat honetan estreinatuko da, Leioako Kulturleioan. Ekainak 17 Ondarroako Kafe Antzokian ikusi ahal izango da, eta uztailak 1 Azpeitiko San Agustin kultur gunean.

Unai Elizasuk izan zuen horrelako egitasmoa lantzeko ideia. «Behin, irratian elkarrizketa bat entzuten ari nintzela, dantzari batek esan zuen oso zaila zitzaiola bere urrats horien bidez sentipen jakin batzuk adieraztea». Halaxe, Elizasuk deitu zion Aiert Beobide dantzariari eta gauzak zehazten hasi ziren. Bi lagun hauek dira ikuskizunaren zuzendariak.

Urte oso bat lanean

Aiert Beobideren dantza konpainiak Haatik du izena. Hauxe du aurreneko ikuskizuna. Dantzariek urte oso bat eman dute koreografiak zehazten eta entseguak egiten. «Momentu onean zatoz, esan nion Unairi. Orduantxe ari ginen ikuskizunen bat sortu nahian. Baina ikusi genituenean lehenbiziko bertso eta kantak lan zaila iruditu zitzaigun. Normalean dantzariok sentsazioekin egiten baitugu lan, baina oraingoan hitzezko mezuak daude, eta mezu horiek lehentasuna dute. Baina gero, aurrera egin ahala, lan dibertigarria izan da. Eta kostako da berriz ere horrelakorik egitea», adierazi zuen Beobidek.

Hauek dira Haatik-eko kideak: Aiert Beobide, Maitane Mujika, Onintza Odriozola, Garazi Lekuona, Gotzon Poza eta Iurre Aranburu. Euskal sustraidun dantza garaikidea egiten dute. «Ikusten da argi sustraiak non ditugun», esan zuen Beobidek atzoko agerraldian.

«Hemen garrantzizkoa bertsoen mezua da», jarraitu zuen Beobidek. Eta zein ote mezu hori? «Badaude tartean kritika batzuk gizarte honi», esan zuten zuzendariek. Batetik, Sustrai Colinaren bertso berri ba-tzuk egongo dira; bestetik, kanta edota kanta-zati batzuk, lagun eta talde hauenak: Mikel Urdangarin, Katamalo, Aitor eta Jon Sarasua, Gu ta gutarrak, Maddalen Arzallus eta MirenAmuriza.

Eszenatokian dantzariak egongo dira bakarrik. Bertsoak, kantak eta doinu guztiak aurrez grabatuak izango dira. Dantzariak banaka, binaka eta hirunaka ariko dira (bertsoak nolako diren) eta dantza egiten ez dutenek zurezko aulki tolesgarri batzuetan egongo dira eserita, zain eta begira; jaialdietan bertsolariak egon ohi diren moduan. Funtsean, bertso-jaialdi baten egitura izango du ikuskizunak.

Ramón García arduratu da arropen diseinuaz. «Arlo hori erabaki-tzerakoan tirabirak izan ditugu», aitortu zuten atzo zuzendariek.