Errenteriako Erromeria Eguna hilaren 15ean ospatuko da zortzigarren aldiz

Txirri, Mirri eta Txiribiton Junior pailazo-talde berria ere jardungo da

«Helburua, betikoa da: herri dantzen eta musiken inguruan jaialdi handia egitea, eta jende asko dantzan jartzea», adierazi zuen atzoko aurkezpenean Ereintza dantza-taldeko Jon Mayak. Talde hori izan da antolatzaile hasiera beretik.

Oso goiz hasiko dira ekitaldiak. Goizeko 10etatik aurrera diana joko dute musikariek kalerik kale. Handik laster, 11:00etan, Aiko Taldea ariko da dantzarako jotzen, dantza-maisu eta guzti, jendea animatu nahian. Talde horretako Aitor Furundarena eta Sabin Bikandik atzo esan zutenez, «dantza naturala» eta «Euskal Herrian egin izan dena» proposatzen dute; hau da, txotisak, baltsak eta pasodobleak, besteak beste. «Guk ez dugu jendea arnas estuka ikusi nahi, adibidez fandango bat bukatu eta hurrengo pieza hasi ezinda. Eta errepertorio arrunta lantzen dugu», esan zuen Bikandik.

Gero, beteranoen soka-dantza etorriko da. «Iaz eman genion hasiera atal honi, eta esperientzia ederra izan zen», adierazi zuen Jon Mayak.

Umeek, berriz, Txirri, Mirri eta Txiribiton Junior pailazoen jarduna ikusteko aukera izango dute, 17:15etik aurrera Zumardian. Xabier Otaegi Txirri-k eta Jose Inazio Ansorena Mirri-k etxean bertan daukate erreleboa: bataren seme Mikelek eta bestearen alaba Kattalinek ekin diote pailazotzari.

«Pailazo klown-en planteamendu klasikoa landu nahi dugu -adierazi zuten atzo Mikelek eta Kattalinek-. Pailazoen gaztetasuna errekuperatu nahi dugu, eta herri txikietara iritsi, telebista-ikuskizuna iristen ez den tokietara iritsi. Adibidez, Alkizan izan gara». Hirugarren kidea, Txiribiton Junior, Fernando Ruiz da. Hau, berriz, ez da Txema Vitoria, Txiribiton helduaren senitartekoa.