Dokumentuaren akzioak
Erdibidetik egindako urratsak
Dantzaz konpainiak Itzik Galili eta Lukas Timulak koreografoen bi lan estreinatuko ditu etzi Donostian
Europan Dantzaz-en moduko konpainia oso gutxi egoteak
erakarri zuen Timulak eslovakiarra harekin lan egitera. Hamar urtez
dantzari gisa aritu ostean, «koreografo freelance» gisa dihardu egun,
eta hara eta hona dabil beti. «Beti gabiltza zerbaiten tartean, eta
ideia hori jorratu nahi nuen. Leku batean jaio naiz, beste batean bizi
naiz, eta beste askotara mugitzen naiz lan egiteko. Beti jende
ezberdinarekin nago, eta jende horrekiko konexioa lantzea interesatzen
zitzaidan», azaldu du. Lekuei baino gehiago, «ezberdinen arteko
harremanei eta sor daitezkeen ekintzei» erreparatu die. Beti tartean
egotearen ideia horri lotuta, «jaiotzetik heriotzara bitarte beti oin
bat leku batean eta bestea beste batean» izateari buruz gogoeta egin du.
«Ideia hori liluragarria iruditzen zait, eta bertan murgiltzen saiatu
naiz». Horretan oinarritu du koreografia. Zazpi dantzari arituko dira
taula gainean, Santaolalla, Husschka eta Arvo Parten musikarekin.
«Edozein erritual intimori» aurre egiten dion koreografia sortu du Itzik Galili israeldarrak. Erritmo markatuak dira Flash deluxe-ren
ezaugarri nagusia, eta Paxkal Indo arduratu da haiek sortzeaz,
txalaparta oinarri hartuta. Tartean egotearen ideia kontzeptua
txalapartan ere izaten dela gogorarazi du, beti biren artean gauzatzen
baita musika, eta txalapartariak bata bestea gabe ez direlako ezer
sortzeko gai. Danborrak ere baliatu ditu piezan, eta Donostiako
danborradari keinu bat ere egiten dio. Sorkuntza berriarekin batera,
Galilik 2008an sortutako Earth apples pieza berriro eskainiko dute, oraingoan bost emakume eta bi gizonek osatutako dantzari taldearekin.
Konpainia
gisa bost urte baina elkarte moduan hamar urte beteko ditu Dantzaz-ek
aurten. Horregatik erabaki dute urtero legez sorkuntza berri bat egin
beharrean bi estreinatzea. Entsegu irekia egingo dute gaur Viktoria
Eugenia antzokian, 20:00etan. Sarrera doakoa da, baina gonbidapena jaso
behar da txarteldegian. Hala egiten dutenek sarrera baten truke bi
lortzeko aukera izango dute etziko estreinaldirako.
Dantza, arte «hauskorra»
Dantzaz-ek
dantzari gazteei jauzia ematen laguntzea ez ezik publikoa sortzea eta
dantza herritarrei hurbiltzea xede dituela azaldu du Antton Azpitarte
Donostia Kulturako zuzendariak. Halako proiektuak laguntzen
jarraitzearen premia nabarmendu du Haritz Solupe Foru Aldundiko
Kulturaren Sustapen eta Hedapenerako zuzendariak. Bat etorri da haiekin
Claverie ere. Hamar urteotan zortzi koreograforekin zazpi sorkuntzatan
lan egin dutela eta taldetik pasatu diren 38 dantzarietatik 28 Europako
konpainietan lanean ari direla azaldu zuen. Taldeak instituzioen
laguntza badu ere, dantzak «arte hauskorra izaten segitzen» duela uste
du Claveriek, eta laguntzen jarraitu beharra dagoela. «Aukera dago
euskal dantzari profesionalak izateko».
Bestalde, Dantzaz-ek Euskal Herrian, Frantzian eta Espainian zehar bira egingo duela jakinarazi du zuzendariak.
Konpainiako bi dantzari, Itzik Galiliren Flash deluxe koreografiaren zati bat interpretatzen. / JUAN CARLOS RUIZ / ARGAZKI PRESS
Dokumentuaren akzioak