Emazteek euskal dantzetan izan duten lekua aztergai Donibane Lohizunen

Iaz Donapaleun eta Baigorrin hitzaldiak eskaini eta, Oier Araolaza antropologo eta dantzaria Donibane Lohizunen izanen da "Emakumeak euskal dantzetan: gezur baten historia" lemapean hitzaldi bat eskaintzeko urriaren 2ko 18.00etan.

Dantza tradizionalean genero eraikuntza ikertu du Oier Araolazak. Historian zehar genero eraikuntza hori garatuz joan da eta indartu egin da batez ere XIX eta XX. mendeetan. Garai horretan neska dantzari eta mutilen arteko ezberdintasuna indartzen da, sexuen biologizazioa dela eta.

"Ikuspegi zientifiko batetik, emazte eta gizonen arteko ezberdintasuna aldarrikatua da. Ideia horretan oinarrituz, ezberdinkeria justifikatua da ez soilik gorputzari dagokionez, baizik eta publikoki dugun jarrerari dagokionez ere", azaldu zuen Donapaleun eskainitako hitzaldian. Hori dela eta, emazte eta gizonek ez dute ez besta egiten ezta dantzatzen ere bermaneraz.

Generoen eraikuntza horrek eztabaida sortzen segitzen du Euskal Herrian gaindi. Oroitarazi behar da, hainbat herritan emazteen parte hartzea dantza emanaldietan kolokan jarri eta eztabaidak sortu dituela. Antropologoaren iritziz, gaiak aitzina eginen du belaunaldi berriei esker. Horiek ez baitute generoen ezberdintasuna lehen bezala ikusten.

Kulturak etengabe garatzen ari dira. Eta aldaketak ez du ohituraren kontra jotzen, aurkakoa. "Aldaketak denboran zehar kultura maitatzea eta bizitzearen seinale da", gehitu du.

Horrelako hausnarketek lekua izanen dute Donibane Lohizuneko hitzaldian. Etorkizunari begira ere jarriko dira ziurrenik parte hartzaileak. Bere erranetan, etorkizun batean ez direlako emazte zein gizon dantzariak existituko. Denak dantzariak izanen baitira.