Sasibil abesbatzak, Urretxu-Zumarragako Irrintzi dantza taldeak eta Sotto Vocce orkestrak eskainiko dute, Zelaan

Sasibil abesbatza, Sotto Vocce orkestra eta Urretxu-Zumarragako Irrintzi dantza taldeak egingo dute emanaldia. Guztira 80 lagunek parte hartuko dute. Horrela eman zuten aditzera atzo Pilarreneko ganbaran egindako aurkezpen ekitaldian Antton Irizar Idiazabalgo alkateak, Aitor Uria Sasibil abesbatzako zuzendariak eta Amaia Zabaleta eta Iker Rodriguez Irrintzi dantza taldeko kideek.

Urtarrilean, Iparragirre herri eskolaren 25. urteurreneko ospakizunen barruan, Euskal Herriko Gazte Orkestraren emanaldia antolatu zuten Idiazabalen. Irizarrek aipatu zuenez «bertan lortutako arrakastak bultzatu gaitu herri eskola eta Udala zartzuela antolatzera». Are gehiago, Udaleko Kultura Batzordeak Idiazabalen ez ohikoak diren musikak idiazabaldarrei gerturatzeko Beste Musikak izeneko zikloa antolatu duela gaineratu zuen alkateak. «Zikloari hasiera emateko zartzuela generoa aukeratu dugu».

Giro herrikoia bilduz

Zartzuela herrialde ezberdinetako giro herrikoia eta kultura jasotzen duen genero musikala da. Hitza, musika, antzerkia eta dantza uztartzen dira bertan.
 Sasibil abesbatzako zuzendari Aitor Uriak esan zuenez «El Caserio lanak Arrigorri izeneko Euskal Herriko alegiazko lurralde baten giroa azaltzen du. Bertan baserria familiakoen artean geratu dadin bi ilobak ezkontarazi nahi dituen gizon baten historia kontatzen du, beste historia batzuekin uztartuta».

El Caserio-n lirika mailan ahots eta musikari ezagunek parte hartzen dute. Helena Gallardo (Placido Domingo Saria), Jesus Lavid tenorea (Pedro Lavirgen Saria), Juan Carlos Barona (Madrilen bi urtez El fatasma de la ópera abestutakoa) eta Jorge Paez (Compañia Lirica Nacionaleko baritono bakarlaria), Sotto Voce Orkestra, Lirica Sasibil abesbatza (bere baitan Teatro Barakaldo lehen saria duena) eta Jose Luis Egiluz (sarritan Bilboko orkestra zuzentzen duena).

Urretxu-Zumarragako Irrintzi dantza taldeak, berriz, bi dantza eskainiko ditu zartzuelan. Mutilek Zumarragako Ezpatadantza dantzatuko dute, eta neskek, berriz, Erreginetan izenekoa.

Iker Rodriguezek, Zumarragako Ezpatadantzaren jatorriari dagokionean, azaldu zuen Zumarragako udaletxean aurkitu diren lehen datuak 1630. urtean kokatzen direla. «Dena den, autore dezentek diote jatorria oraindik antzinagokoa dela».

Zumarragan bi aldiz soilik dantzatzen dute Ezpatandantza: Santa Isabel egunean Antiguako ermitan, eta Andre Mari egunean Zumarrarragako parrokian. Ezpatadantza luzea da, eta zartzuelan zati txiki bat dantzatuko dute soilik, kaleko Ezpatadantza, alegia.

Neskek egingo duten dantza nafarra da jatorriz. Zortzi neskak parte hartuko dute. Bi erregina aukeratuko dituzte eta zuriz jantzi. Musikaren laguntzarik gabe egingo dute dantza, eurek abestuz eta panderoa joz.