Ehun bat lagunek parte hartuko dute Irrintzik egingo duen dantza jaialdian

Zelai Arizti aretoan da ikuskizuna larunbatean; 19:30erako iragarrita bazegoen ere 19:00etan hasiko da.

Urretxuko eta Zumarragako kultur gidan 19:30erako iragarrita bazegoen ere, jaialdia ordu erdi lehenago hasiko da, 19:00etan. Sarrerak jasotzeko leihatila ordubete lehenago zabalduko dute. Ikuskizuna doan izango da.

Irrintzi taldeko kide Alaitz Artolazabalen arabera Lapurdiko kontradantzak dantzatuko dituzte aurten. «Horixe izango da berritasunik nabarmenena erakutsiko ditugun dantzei dagokienez. Kontradantzen aurretik mutilek makil dantza egingo dute sarrera gisa».

Aipatzekoa da, baita ere, Iker Rodrigezek Oskorriren ezpatadantzarekin prestatutako koreografia. «Horretarako musikarien laguntza izango dugu». Musikari gehienak urretxuarrak eta zumarragarrak izango dira. Jaialdian ondoko musika tresnak entzun ahal izango dira: txistua, danborila, trikitia, soinua, perkusioa, gitarra eta biolina. «Musikarekin jaialdia aberasteko asmoa daukagu, eta horregatik musika tresnen zerrenda zabaldu dugu aurten».

Sorpresa bat baino gehiago

Inauterietako dantzak ere erakutsiko dituzte, Altsasukoa eta Abaltzisketako Txantxoena. Gainera, Axuri-beltza, Banakoa, Arku dantza eta beste ere egingo dituzte.

Larunbateko jaialdian, dantza eta musika uztartzeaz gain, ikus-entzunezkoentzat tartea ere egingo dute. «Emango ditugun irudiekin lotutako sorpresaren bat edo beste egongo dela aurreratuko dut. Gainera, Bertso Eskolako kideei hordagoa bota diegu, eta ezetzik esan ez dutenez bertsoren bat edo beste entzuteko aukera ere izango dute Zelai Ariztin biltzen direnek», jarraitu du Irrintziko kideak.

Urtero Zelai Arizti aretoa bete egiten da Irrintziren saioa ikusteko, eta jendea kanpoan gera daiteke. «Aurretik Beloki pilotalekuan egiten genuen jaialdia, baina zinema aretoa frontoia baino egokiagoa da; frontoiak ikus-entzunekoak eskaintzeko aukerarik ez zigun ematen, deserosoagoa zen ikusleentzat eta argiekin jokatzeko modurik ez zigun uzten», azaldu du Artolazabalek.

Jaialdiarekin helburu bat baino gehiago bete nahi dituzte dantza taldekoek. «Taldeko kide guztiok taulatu bera konpartitzea, egiten dugun lana gizarteratzea eta, nola ez, inguruan ditugun gurasoei eta laguntzaileei ikuskizuna eskaintzea». Irrintzi dantza taldeak lau urtetik gorako haurrei eskolak eskaintzen dizkie, eta horrela taldea handituz doa urtero.