Ederraz mozorroturiko piztiak

Damian Muñozek eta Virginia Garciak bihar estreinatuko dute giza kondizioari buruzko 'Pobres bestias' obra

Muñozek eta Garciak osatzen duten La Intrusa konpainiak ekoitzi du Pobres bestias obra, Arriaga antzokiarekin batera. Hala, Bilboko teatroan estreinatuko dute bihar. Horretaz gain, beste bi emanaldi egingo dituzte etzi eta etzidamu (20:00). Arriaga antzokiak historian lehenengoz ekoizten duen dantza obra da Pobres bestias.

Jorge Fuentes aktorearekin batera ariko dira oholtzan Muñoz eta Garcia. Azaldu dutenez, hasieran ez zuten asmorik aktorearen lana dantzarien mugimenduetan barruratzeko. Aparte ematea pentsatua zuten, «dantza eta antzerkia bereizita». Obra sortzeko prozesuan aurrera egin ahala erabaki zuten aktoreak ere dantzan egitea. «Fresko zetorren, kutsatu barik, eta gehienetan mugimendu eta bizio jakin batzuk izaten ditugu», adierazi du Garciak. Jorge Fuentesen lanak, horrenbestez, «sinesgarritasuna» ematen dio obrari, Muñozen arabera. «Oso egiazkoa da».

Orobat, Enric Montefusco musikariarekin partekatuko dute agertokia. Zuzenean ariko da Montefusco, eta obrarako espresuki sorturiko piezak jarriko ditu unean-unean. «Harizko tresnen edertasuna jasotzen duten erritmoak, rocka eta musika elektronikoa. Estilo horietako doinuak izango dira, eta eszenaren giroaren eta animoaren arabera joango dira elkarrekin lotuz», azaldu du musikariak.

Dantzariek eta musikariak elkarrekin egin dute bidea. Batera diseinatu dituzte mugimenduak, pausoak, keinuak, bibrazioak, energiak eta notak. Muñozen eta Garciaren imaginarioa, hortaz, musika bihurtu du Montefuscok. Eta Montefuscoren doinuak, berriz, beren pentsabidearen parte bihurtu dituzte Muñozek eta Garciak.

Bideoa ere baliatuko dute gizakiaren nortasunaren inguruan garaturiko pentsamoldea azaltzeko. Sei pieza labur proiektatuko dituzte agertokiaren atzealdean paraturiko pantailan.

Giza kondizioari buruzko gogoeta plazaratuko dute, hots, gizarteari, gizakiari eta gizakien arteko harremanei buruzkoa. Iluntasunetik argira bidaiatuko dute, «ezkortasunetik itxaropenera».

Garciak azaldu duenez, «kontzientzia hartzeko bidea da obra. Gogorra da ibilbidea, gogorra izan da, halaber, obra prestatzea, hausnartzea, idaztea...». «Hasierako testuak guztiz ezkorrak ziren, erabat ilunak, baina emeki-emeki bestelako ikuspegia hartu dugu, baikorragoa», erantsi du Muñozek. Umorea eta ironiaren bidez eman diote buelta egoerari. «Hor dago koska, egoera iraultzea da gakoa ». Pobres bestias, funtsean, zintzotasun ariketa dela diote koreografoek, «nork bere buruarekin egin beharrekoa». Pertsonek gaiztakeria berezkoa dutela susmoa hartzen hasiak baitira. «Ez al da egia burutapen txar gehiago izaten ditugula onak baino? ».

Bizitzak teatrotik ere baduela uste dute. Telebista platoa irudikatuko dute, hortaz, oholtzan. Eszenarik eszena maskara kenduko diote ederraz mozorroturiko piztiari, eta saiatuko dira erakusten piztia begiekin ikusita baino ederragoa dela mundua pertsonen ikuspegiarekin begiratuta.