dFeria egitea erabaki dute

Trantsizioko ekitaldia izango du aurten, eta hiru egunetan 12 obra programatuko ditu, Euskal Herrian ekoitziak guztiak . Aurrekontu txikiagoa izango du: 174.000 euro, eta ez lehen bezala 350.00o euro inguru

dFeria izenari Antzerkiaren eta dantzaren euskal hitzordua leloa gehitu diote antolatzaileek, aurtengo ekitaldiari begira, eta, guztira, hamabi emanaldi eskainiko ditu, guztiak Euskal Herrian ekoitzitakoak, ekainaren bigarren erdialdeko hiru egunetan.

Jaialdia ez egitea erabaki zenean, krisi ekonomikoaz gain, aurreko ekitaldietako ikusleen kopuru eskasa aipatu zen jaialdia bertan behera uzteko arrazoien artean. Aurten, ikusleak erakarri nahian, sarrerak nahiko merke jartzeko asmoa dute: bost eta hamar euro bitartekoak helduentzat, eta hiru euro ingurukoak gazteentzat. Antzoki Zaharrean, Lugaritz kultur etxean, Gazteszenan eta Viktoria Eugenia antzokian izango dira emanaldiak.

Programazioa osatuko duten hamabi emanaldiak Norka Chiapuso dFeriako zuzendaria buru izango duen batzorde batek hautatuko ditu. dFeriaren iazko ekitaldiaz geroztik estreinatutako obrak izango dira, eta baliteke dFerian estreinatutakorik ere izatea. Dantzaren eta antzerkiaren arteko oreka egokia egon dadin nahi du batzordeak, Euskal Herriko produkzio osoa kontuan hartuta. Aurrekontua murriztearen ondorioz, konpainiek ordainsariaren %50 kobratuko dute.

Programatzaileen aldetik ere izango da murrizketarik. Gehienez ere ehun programatzaile gonbidatuko ditu jaialdiak. Hautatutako konpainia bakoitzak zein programatzaile gonbidatu nahi duen adieraziko du, eta zerrenda horietan oinarrituta hautatuko dira, gehienez ere, 60 edo 70 programatzaile inguru. Gainerakoak, ehun osatu arte, dFeriak hautatuko ditu. Gonbidapena jaso ez duten programatzaileei logistika aldeko aholkuak eta ikuskizunetarako sarrerak emango zaizkie.

Salmentetan baldintza bereziak eskaintzea eskatu diete antolatzaileek konpainiei, zehazki, %10eko deskontua egitea.

«Haiekin egin ditugun bileretan, sektoreko ordezkariek esan digute azokak jarraitu beharreko ereduaz gogoeta egin beharra dagoela etorkizunari begira, baina gogoeta hori oinez egin behar dugula, ibiliz, eta 2010eko ekitaldia bertan behera utzi gabe», azaldu du Denis Itxaso Donostiako Kultura eta Gazteria zinegotziak. «Gainera, argudiatu dute, arrazoi osoz, justu krisi garaietan egin behar dela ahalegin handiena sektorea mantentzearren».

Laguntza behar duen sektorea

Antzerkia eta dantzarena «sektore hauskorra da, ahula», Itxasoren ustez, «eta garai hauetan azoka ez antolatzeak sektorea babesik gabe utziko zukeen. Zergatik? Azokaren xede nagusia antzerki eta dantza konpainiek egindako lana erakustea delako, gero saldu eta programadoreen bitartez zabaltzeko. Azokarik gabe, horretarako oso baliagarria den tresna bat galduko zatekeen».

2011ko ekitaldiak beste bide bat hartu beharko duela uste du Itxasok: «sektorearekin ahalik eta gehien adostutako arauekin eta nortasunarekin». Horregatik, sektoreko ordezkariekin biltzen jarraitzeko asmoa dute Donostia Kulturako ordezkariek.

Gogoeta horiek egiteko lagungarri izango delakoan, azoka amaitzen denean egindako salmenten kopurua ematea eskatuko diete antolatzaileek dFerian programatutako konpainiei.

Ahalegina eskertu dute sektoreko ordezkariek

Ondorengo ekitaldietan dFeriak berriro ere Euskal Herritik kanpoko obrei lekua egitearen alde daude