Dantzariak, tradizioari eutsiz

Mañaria. Aurtengoa 41. aldia izango du Ezpatadantzari Egunak; zortzi herritako ehun dantzari ariko dira

Dena den, bertaratzen diren guztientzat bi dantza izango dira gainerakoak baino bereziagoak: Bizkaiko ezpatadantza eta dantzari dantza. Izan ere, bi dantza horiek tradizio eta esanahi handikoak dira Durangaldean. Gerediaga elkarteak argitaratutakoaren arabera, dantzari dantza galtzeko arriskuan egon zen XX. mendearen hasieran, baina 1886an Durangon eta 1991n Iurretan (Bizkaia) egin ziren Euskal Jaietan berpiztu egin zen.

Horri esker, Bizkaiko beste hainbat herritan dantzari dantza ikasten hasi zen jendea, eta gaur egun dantza eskoletan ere irakasten dute. Haur eta heldu asko ari dira dantza horiek barneratzen, eta etzi hamalau dantza taldek parte hartuko dute Ezpatadantzari Egunean.

Gauean, erromeria

Bertan izango dira, besteak beste, Garaiko, Iurretako, Berrizko, Durangoko, Abadiñoko, Izurtzako, Mañariko eta Elorrioko ordezkariak. Dantzari guztiak arratsaldeko zazpietan elkartuko dira herriko elizaren aurrean, eta kalejira moduko baten bidez plaza nagusirako bidea hartuko dute. Ekitaldi nagusia bertan izango da, zazpi eta erdiak inguruan. Ordu eta erdiz dantza ikuskizunaz gozatzeko aukera izango dute ikusle guztiek, eta, ondoren, eurek izango dute dantzan aritzeko parada.

Izan ere, festa ez da amaituko dantza ikuskizunarekin. Dantzarien saioa amaitu bezain laster lagunarteko afaria egingo dute. Dantzaria ez denak ere bertan afaltzeko aukera izango du. Ondoren, berriz, erromeria izango da, Ansorregi taldearen eskutik. Urtez urte hazten ari den jaia da Espatadantzari Eguna, eta aurten ere jende andana biltzea espero dute antolatzaileek.

DURANGALDEKO EZPATADANTZARI EGUNA

Non. Mañarian (Bizkaia).

Noiz. Etzi, 19:00etan.

Ezpatadantzari Egunak sona handia du Durangaldean, eta aurten ere jende andana biltzea espero dute antolatzaileek. / GEREDIAGA ELKARTEA