Hemen zaude: Hasiera Hemeroteka Dantzari osoak

Dokumentuaren akzioak

Dantzari osoak

Kritika, Dantzaz Konpainia

Egilea
Agus Perez
Komunikabidea
Berria
Mota
Kritika
Data
2009/06/07

Gaueko lehen pieza, Songeurs izenekoa, konpainia gaztearen aurreko lanaren parte izan zen. Lur sagar deitu zen orduko hura, eta Christophe Garciaren koreografia errepikatzeak aukera ederra eman digu berez ona zen mugimenduaren kalitatean igoera nabarmena gertatu dela ikusteko. Taula gaineko hiru mutil jostagarriek etengabeko elkarrizketan arituko balira bezala jokatu dute uneoro, eta gorputz osoaren zehaztasuna leuntasun delikatuarekin konbinatu dute, koreografiak transmititzen duen bizi izatearen poza ikusleenganaino zabalduz.

Dudarik gabe, gaueko bigarren koreografia izan da lauretan bikainena. Hilde Koch donostiarraren Torque pieza oso era enigmatikoan hasten da, eta hasiera batean eremuaren banaketa geometrikoak eta bikoteen arteko paralelismo diagonal batzuk izan dira nagusi, konpainiako kide gehienak balantzaka eta geldiro mugitzen ziren bitartean. Musikaren lehen une horietan piano nota solteek eta biolin esaldi laburrek urratu dute isiltasuna. Mugimendua, isiluneak eta musika, dena zetorkigun zatika, baina pieza aurrera joan ahala bat egin dute elementu guztiek, denak hartu du zentzua Arvo Parten partitura inguratzailearen pean, dantzariek erritu estrainio eta perfektu bat gauzatu dute eta dantzaren misterioan murgildu gara guztiok.

Bestalde, Torque-ri buruz aipatzekoa da konplexutasun handiko koreografia dela, eta dantzari bakoitzak erregistro asko eman behar dituela, are gehiago kontuan izanda inprobisazioek rol garrantzitsua betetzen dutela mugimenduaren diseinuan.

Atsedenaldiaren osteko bi lanen sortzailea Eric Gauthier izan da. Haietariko lehenengoan (Ballet 101) balet klasikoaren oinarrizko jarrerak abiapuntutzat hartzen dira ehun jarrera berri sortzeko, eta eszenako dantzari bakarrak denak burutu ditu off-eko ahots baten aginduei jarraituz, dantza-azterketa batean balego bezala. Koreografoak, gainera, ariketa berriak aprobetxatu ditu balet klasikoari erreferentzia umoretsua egiteko, baina lan honetatik gehien gogoratuko duguna dantzari solistaren prestakuntza eta gaitasun itzela izango dira.

Gaueko azken pieza Björk duets izan da, eta koreografoak hiru bikote jarri ditu taula gainean, haien harreman fisiko eta emozionala azaleratuz, aretoko dantzak oinarritzat hartuta. Lan eskematikoa eta irmoa izan da aldi berean, baina aurrekoekin konparatuta zirrara apalagoa sortu du.

Dantzaz konpainiaren bigarren egitarau honekin argi geratu da, beraz, dantzari hasiberriak prestatzeko proiektuaren sendotasuna, eta horren froga da hango gazteek lan eskaintzak jaso dituztela jada hainbat leku handitatik, hala nola Preljocaj konpainiatik, Milango Scalatik edota Ballet Biarritzetik besteak beste.

Konpainia: Dantzaz. Koreografiak: 'Songeurs' (Christophe Garcia), 'Torque' (Hilde Koch), 'Ballet 101' (Eric Gauthier), 'Björk duets' (Eric Gauthier). Lekua: Viktoria Eugenia antzokia (Donostia). Eguna: Ekainak 5.

Dokumentuaren akzioak