Hemen zaude: Hasiera Hemeroteka Euskal Herriko Dantzari Eguna Barakaldon egingo dute igandean

Dokumentuaren akzioak

Euskal Herriko Dantzari Eguna Barakaldon egingo dute igandean

Egilea
Irune Berro
Komunikabidea
Berria
Tokia
Bilbo
Mota
Albistea
Data
2006/09/20
Ekitaldiak goizean goiz hasiko dituzte. Hirigunetik kalejira egingo dute San Bizente parkeraino, 10:30ean hasita. Dantzariez gainera, Barakaldoko beste talde batzuek parte hartuko dute. Kalejiran ariko dira, besteren artean, Barakaldoko Udal Banda eta Txistulari Taldea, Laguntasuna erraldoien konpartsa eta Bizkaiko Gaiteroak. 11:00etan dantzari taldeen aurkezpena egingo dute San Bizente kiroldegian. Guztien artean agintariena dantzatu ondoren, herrialdeko saioak hasiko dituzte. Arabako dantzak emango dituzte lehendabizi. Lezeako zortzikoa eta jotak dantzatuko dituzte. Nafarroa Behereko taldeek hartuko dute ondoren agertokia, eta eskualdunak, sorginak, kontradantza eta dantza luzea erakutsiko dituzte. Bizkaiko dantzarien txanda izango da ondoren. Besteren artean, makila jokoa eta gorulariak eskainiko dituzte. Bestalde, Gipuzkoako dantzariek Legazpiko ezpata-dantza, zinta dantza eta agurra dantzatuko dituzte, eta Lapurdiko dantzariek Ahurtiko makila, Beteluren fandangoa eta makil dantza. Nafarroa Garaiko piezak ikusi ahal izango dituzte, halaber, San Bizente kiroldegira bildutakoek. Zehazki, Lizarrako desmayoa eta Larraungo ingurutxoa. Zuberoako dantzariek barrikada haustea antzeztuko dute. Gainera, ostalertsa, godalet-dantza eta satanak emango dituzte.

Fandangoa eta arin-arina dantzatuko dituzte talde guztiek ondoren. Eta Luhartz taldearekin erromeria egingo dute 16:30ean, San Bizente parkean. Egun osoan eskulangintza azoka egongo da, halaber.

DANTZA ERAKUSTALDIA BASAURIN. Euskal Herriko bost dantzari taldek beren herrietako piezak erakutsiko dituzte Basaurin (Bizkaia) datorren larunbatean, hilaren 23an. Gasteizko Indarrak Villabuenako makil dantza eskainiko du. Iurretako Mikel Deunak dantzari dantza eta gorulariak emango ditu, eta Beasaingo Aurtzakak, Loinazko soka dantza eta ezpata-dantza. Iruñeko San Lorenzoko dantzariek San Lorenzo kalean urtero egiten duten pieza erakutsiko dute. Eta Miarritzeko Maritzuli taldeak Lapurdiko hainbat dantza eta jolas eskainiko ditu Basaurin.

Dokumentuaren akzioak