Edukira salto egin | Salto egin nabigazioara

Tresna pertsonalak
Hemen zaude: Hasiera Hemeroteka Dantzaren egoera aztertuko dute Inpernuko Poza jardunaldietan

Dokumentuaren akzioak

Dantzaren egoera aztertuko dute Inpernuko Poza jardunaldietan

Plazetan zergatik egiten den «inoiz baino dantza gutxiago» argitzen saiatuko dira hilaren 7an eta 8an

Komunikabidea
Berria
Tokia
Donostia
Mota
Albistea
Data
2010/09/04

Euskal Herriko Trikitixa Elkarteak azaldu duenez, sarritan egokitzen zaie trikitilariei dantza emanaldi baten ostean jo behar izatea. Dantza saioa amaitzean, dantzariek kaleko arropak jantzi eta ez da dantza gehiagorik izaten, «trikitilariei begira» geratzen dira dantzariak. Joera hori Euskal Herriko bazter guztietara zabaltzen hasia ei da, eta egoerak kezkatuta, gai horren inguruko mahai-inguru bat eta saio praktiko bat antolatu ditu Trikitixa Elkarteak.

Dantza, ikuskizuna eta plazera du izenburu mahai-inguruak, eta Jon Maia dantzariak, Jon Ostolaza trikitilariak eta Iñaki Irigoien ikerlariak parte hartuko dute. Gaur egun dantzak plazan duen egoeraren inguruan jardungo dute, eta moderatzaile lanak Joxe Juan Ugalde kazetari eta dantzariak egingo ditu. Asteartean izango da saioa, Donostiako liburutegiko sotoan, 19:30ean.

Hurrengo egunean, toki eta ordu berberean, Dantza dezagun saio praktikoa zuzenduko du Jokin Otamendi dantzariak. Arkaitz Miner eta Garikoitz Otamendi musikariek ere parte hartuko dute, pieza guztiak biolinarekin interpretatuko baitituzte. Euskal Herriko dantza tradizionalez gain, Europako zenbait herritako dantzak ere irakatsiko dituzte saio praktiko horretan.

Dokumentuaren akzioak