Dantzarako jarrera hartuta

Plaza giro

Pianoaren notak ozen entzuten dira, gela haurrez beteta badago ere; badute-eta kontzentrazio handia eskatzen dien zeregina: pianoaren notei segitu eta, aldi berean, ispiluaren eta beraien artean dagoen irakaslearen urratsei. 30 neska eta mutil bat dira dantzan hasten lehenak, Gipuzkoako Dantza Profesionalen Elkarteak Donostian antolatu dituen ikastaroetan. 10 eta 12 urte bitartekoak dira, eta dantza klasikoan hasierako maila egitera joan dira. Euren hiri edo herrietako eskoletan ibilitakoak dira, baina esperientzia handiko beste irakasle batzuen bidez dantzarako urrats berriak ikasteko aukera dute egunotan, eta ikasteko beste modu batzuk ikusteko.

Arteleku hartu dute egoitza bost egunetarako. Atzo hasi eta asteartera arte dantza eskola bihurtuko da. Joan-etorria hasi da; txikienen ondoren nerabeak sartu dira, erdiko mailan, eta horietako askok maila aurreratuan errepikatuko dute gero, irakasle lanetan hasiak diren helduekin batera. Ikastea baitute bereziki helburu, behin klasea amaituta sentitzen duten atsegina eta lasaitasuna ezkutatzen ez duten arren. Dantza doinuak Alberto Sagardiaren pianotik zuzenean entzuteak ere izango du eragina.

Angeles Lacalle irakaslearen aholkuak ere ez dira urduritasunerako arrazoi izan. «Ez ezazue pentsatu hurrengo urratsa nola irtengo zaizuen, kontzentra zaitezte momentukoan, eta gaizki ateratzen bada ere, jarrerari eutsi».

20 urtetik gora dira Gabonetan ikastaro hauek antolatzen direla, eta beste irakasle batzuekin ikasteko eskaintzen den aukera da gehien erakartzen duena, Maria Eugenia Maisuetxearen ustez. «Irakasle bakoitzak bere modua du eta dibertsifikatze hori oso garrantzitsua da dantza ikasteko. Pedagogia aldatuz joan da, gainera, eta irakasleak gehiago hurbiltzen zaizkie orain ikasleei, ez dira horren hotzak». Gipuzkoako Dantza Profesionalen elkarteko kide da Maisuetxea, eta Euskal Herritik kanpoko irakasleak ekartzeko egiten duten ahalegina nabarmendu du.



Garaikidea eta jazza

Arrakasta gehien dantza klasikoak eta garaikideak badute ere, jazzean gero eta jende gehiagok ematen du izena. Azken bi estiloak ikastera jende heldua joaten da batez ere. «Dantza ikasitakoak eta utzi zutenak, edo heldutan ikasten hasi direnak ere bai». Arratsaldeetan izango dira dantza klasiko eta jazz dantza eskolak: hasierako mailan batetik eta, erdi maila eta goi mailan, bestetik. Erick Jimenez da garaikidean irakasle eta Patrice Valero jazzean.

Gabonetako oporrak disfrutatzeko modu ona dira ikastaro hauek Artelekura dantzatzera joandakoen iritziz, baina bereziki ikasteko eta hobetzeko baliatzen dituzte. Jarrera horrek erakusten du, Dantza Elkarteko kideen ustez, dantzaren irakaskuntzak Euskal Herrian duen hutsunea. Beste herrialdeetan bezala, Bizkaian eta Gipuzkoan ere irakaskuntza arautua eskainiko duten egoitzak aldarrikatzen dituzte.