Dantza Txapelketa igandean jokatuko da, aurrenekoz urrian

Euskal Herriko 33. Dantza Txapelketa igandean jokatuko da (18:00), ohiko denez Segurako Baratze pilotalekuan. Antolatzaileek atzeratu egin dute, eta aurrenekoz jokatuko da urrian. Guztira hamabi bikote lehiatuko dira, eta lehenbiziko aldiz sexu bereko bikote batek hartuko du parte. Berriz, Eneko Gil eta Nerea Vesga, iazko txapeldunak, ez dira lehiatuko.

Egunaren aldaketa da berritasun nabarmenena, orain arte ekainean jokatzen baitzen txapelketa -San Joan jaietan-, baina antolatzaileek atzeratzea erabaki dute. Dantza solteko denboraldia uda garaian izaten da, eta urteko saio nagusiak sasoia ixteko balioko du. Dantzariek ere nahiago zuten urrian, askok ikasketa konpromisoak dituztelako eta hala hobeto presta dezaketelako txapelketa. Data aldaketa baliatuz, antolatzaileek aurrez jokaturiko hamabi herritako txapelketak kontuan hartu ahal izan dituzte, eta emaitza onenak bildu dituen bikoteak gonbidapena jaso du finalean aritzeko.

Hamabi bikotek hartuko dute parte, eta aurreneko aldiz sexu bereko bat egongo da, Ana eta Marta Ruiz de Austri ahizpak. Zazpi bikote gipuzkoarrak dira, hiru arabarrak eta bi bizkaitarrak. Eneko Gil eta Nerea Vesga iazko txapeldunen hutsunea egongo da, baita ere aurreko sei aldietan hiruna aldiz txapeldun izan ziren Azpitarte eta Parrondo anai-arrebena. Finalean ariko diren dantzarien artean bakarra da aurretik txapeldun izandakoa: Maite Lazkano. 2001ean jaso zuen garaikurra, eta igandean Aitzol Enarekin hartuko du parte.

Fandangoa eta arin-arina

Bikote guztiek bi dantza saio egin beharko dituzte, lehenbizi fandangoa txistu doinupean, eta arin-arina trikitiaz gero. Epaimahaia Rafa Salaberria, Iñigo Manuel, Karlos Sarriegi, Gabriel Alonso eta Xabier Mendizabalek osatuko dute. Epaitzeko garaian lau arlo baloratuko dituzte: erritmoa, dantzariek erritmoaren barruan dantza egiten duten ala ez; berdintasuna, bikoteko bi kideen artekoa; dantza pausoen zailtasuna eta irudi orokorra.

Lau arloak kontuan hartuta emaitza onena lortzen duen bikoteak irabaziko du txapelketa. Irabazleek Segurako Udaleko Sari Nagusia jasoko dute, eta garaikurra euren herriko udaletxean egongo da urte osorako. Herri bateko kideek hiru aldiz jarraian, edo bost aldiz tarteka irabaziko balute, garaikurra udalaren esku geldituko litzateke. Garaikurra Nestor Basterretxearen eskultura bat da, eta eskultoreak omenaldia jasoko du igandean. Sari nagusiaz gain, aurrenekoz parte hartzen duen bikote onenak Gillermo Areizaga sari berezia jasoko du, eta lurralde bakoitzeko bikote onenak beste sari bat jasoko du bere aldundiaren eskutik.

Parte-hartzaileak

(Sestao)

(Donostia-Orio)

(Gasteiz)

(Ordizia-Olaberria)

(Bergara)

(Lezo-Pasaia)

(Azkoitia)

(Gasteiz)

(Sestao)

(Bergara)

(Hernani)