Hemen zaude: Hasiera Hemeroteka Dantza tradizionaletako curriculum bat osatu dute, ikasketak arautze aldera

Dokumentuaren akzioak

Dantza tradizionaletako curriculum bat osatu dute, ikasketak arautze aldera

Egilea
Ainhoa Sarasola
Komunikabidea
Berria
Tokia
Donostia
Mota
Albistea
Data
2010/06/22

Dantza tradizionalen irakaskuntza sustatzeko, Dantzan Ikasi egitasmoa jarri zuen martxan iaz Gipuzkoako Foru Aldundiak, sektoreko eragileekin elkarlanean. Iaz hasi zuten bidea, Donostiako Artelekun Dantzagunea proiektuarekin eskaintzen dituzten ikastaroekin, eta orain beste bi urrats egin dituzte aurrera. Batetik, Gipuzkoako euskal dantza irakasleen egoeraren eta beharrizanen azterketa egin dute. Eta, bestetik, dantza tradizionalen ikasketen oinarrizko curriculum bat osatu dute. Azterketaren emaitzak eta curriculum zirriborroaren edukiak atzo arratsean aurkeztu zizkieten dantza talde, irakasle, ikertzaile, musikari eta unibertsitate nahiz kulturaren alorreko ordezkariei, Donostiako Koldo Mitxelena kulturunean eginiko jardunaldietan.

Irakasle eta dantzari tradizionalek beren trebakuntza zikloa borobiltzeko jakin beharreko eduki eta konpetentzien curriculum zirriborroa osatzea izan dute helburuetako bat. «Galdera bat hartu dugu abiapuntu: dantzan ikas daiteke? Bai, ez dugu zalantzarik, baina errealitatea da ez dugula modu formalik ikasketa horiek burutzeko», azaldu zuen Oier Araolazak -2008tik koordinatu ditu lanok-. Ikasketa horiek noiz edo noiz modu arautuan egin ahal izateko oinarriak jartzen aritu direla adierazi zuen www.dantzan.com atariko arduradunak.

Adituen ekarpenak

Zirriborroa osatzeko proposamenak eskatu zizkieten dantza tradizionalen arloan eta, bereziki, trebakuntzaren alorrean eskarmentua duten hainbat eragileri. Ikerfolk elkarteak, Gipuzkoako Dantzarien Biltzarrak, Eusko Ikaskuntzako Folklore Sailak, Aiko taldeak eta Gasteizko Folklore Akademiak parte hartu dute curriculuma garatzeko lanetan, eta proiektua bere egiteagatik eskerrak eman zizkien Araolazak. «Ez da guk diseinatutako curriculum bat, baizik eta gai honetan urte askoan lanean diharduten lagun eta elkarteek egindako proposamenen apailatzea». Zirriborro bakarra osatzea ez dela lan nekeza izan azaldu zuen, ekarpenetan adostasun maila handia izan baita.

Curriculuma ez dela testu itxia nabarmendu zuen Araolazak, eta izan dezakeen ezarpenaren arabera erabat irekita utzi nahi izan dutela. Halaber, dantza tradizionalaren alorreko ikasketa arautuak ezartzeko aukerak aztertzeko, Eusko Jaurlaritzako Hezkuntza Sailarekin harremanetan daudela jakinarazi zuen, harena baita hartarako eskumena.

Bestalde, Gipuzkoako dantza tradizionalen irakasleen errealitatea zehatz ezagutzeko azterketa Euskal Kulturaren Behatokiarekin elkarlanean egin dute. Gipuzkoan 250 bat dantza irakaslerekin kontaktatu dute, eta 151k galdetegi bati erantzun diote. «Ateratako ondorio nagusietako bat da irakasle horiek oso kontziente direla duten prestakuntza premiaz».

Egindako urratsek zer ematen duten ikusi bitartean, trebakuntzarako ikastaroak eskaintzen jarraituko dute aurrerantzean ere. Izan ere, ikastaroen eskaintzak ikasleen aldetik «erantzun bikaina» izan duela adierazi dute.

Proiektuaren balorazio oso baikortzat eta beharrezkotzat jo zuten Xabier Mendizabal Gipuzkoako Dantzarien Biltzarreko lehendakariak nahiz Juan Antonio Urbeltz Ikerfolk-eko lehendakariak. Proiektua elkarlanaren ondorio izan dela nabarmendu zuen Maria Jesus Aranburu Kultura diputatuak, eta egindako lana beste herrialdeen zerbitzura jarri zuen, «Gipuzkoatik Euskal Herri osoari eskainitako aukera» delakoan.

Dokumentuaren akzioak