Dantza taldearen omenaldia jasoko dute Gervasio Legorburu eta Karmele San Sebastianek

"Dantzen alde egindako lana eskertu gura diegu", azaldu dute Oinarin dantza taldeko kideek otsailaren 3an egingo duten omenaldia dela-eta.
Gervasio Legorburu eta Karmele San Sebastian omenduko dituzte otsailaren 3an, domekan, Antzuolako plazan. Azken 35 urteetan Antzuolako dantzen alde egindako lanaren ordaina izango da. Izan ere, urte mordoa pasa da Legorburu eta San Sebastian dantza eskolak ematen hasi zirenetik. "Hasiera batean, Purita Zabalo eta Bitoriano Etxaniz ere hasi ziren", gogoratu dute Legorburu eta San Sebastianek.

Berreskuratutako dantzak

Dantzak erakusteaz gain, dantza horien nondik norakoak ere aztertu dituzte bi omenduek. "Aratusteetako Sorgin dantza berreskuratu zuten, adibidez. ", gaineratu dute Oinarin taldekoek. "Antzuolako aratusteetako ohiturak ere berreskuratu dituzte; tximinoa, hartza eta hezitzailea, adibidez. Baita ere makila-txiki eta handi dantza, arku dantza eta zinta dantza", diote dantzako kideek.
70. hamarkadako lehen urteetan herri mailan egindako lanaz gain, bailara mailan egindako lana ere eskertu gura diote dantza taldekoek.

Gustura egindako lana

"Guretako dantza, gure herriaren kulturaren zati bat da. Orain arte egindakoa, aurrerantzean ez dadila galdu", erantzun dute bi omenduek eurentzat dantza zer den galdetzean.
Gervasio Legorburu eta Karmele San Sebastian pozik daude jasoko duten omenaldiarekin; baina, "ez dakit merezi ote dugun", gaineratu du San Sebastianek. "Guk gura izan dugulako egin dugu lan dantzaren inguruan, inork behartu gabe", esan dute. Duda barik, pozik daude dantza taldeko gazteak eurekin gogoratu direlako. Aratuste-domekan plazan izango dira "urtero bezala!", diote biek.

Karmele San Sebastian eta Gervasio Legorburu