Dantza, hurbiletik eta perspektibaz ikusia

Sense fi eta Conquassabit izeneko parte bi izango ditu Gelabert Azzopardi dantza konpainia abangoardistak Bilboko Arriaga antzokian gaur taularatuko duen ikuskizunak (20:00etan). Sense fi (Amaierarik gabekoa, katalanez) «hurbiletik begiratzeko pieza» da Cesc Gelabert konpainiako koreografo eta dantzariaren hitzetan; eta Conquassabit (Konbultsoa, latinez) «perspektibaz begiratzeko pieza» da, ikuslea asaldatzea helburu duena. Arriaga antzokiak dantzaren nazioarteko egunaren harira programatu du ikuskizuna gaurko egunez.

Dantzaldiaren lehen zatian dantzari baten imajinaziotik ateratzen diren irudiak antzeztuko dituzte eszenan agertuz doazen dantzek. «Dena imajinaziotik ateratakoa balitz bezala agertzen da», azaldu du koreografoak. Pascal Comeladek obrarako espresuki sorturiko musikaren laguntzaz, barne bidaia «irristakor eta paradoxikoa» izango da lehen atal hau.

Bigarren piezak «mundu azeleratu honi» begiratzen dio. Cesc Gelabertek dio mundu azeleratu batean bizi garela, eta azelerazio horrek guztiongan konnotazio desberdinak sortzen dituela. Conquassabit urakan batekin alderatu du Gelabertek. Urakan batek bezalako egitura du piezak, haren hitzetan, hasierako suntsiketak eta indarrak barealdia dakarrelako gero. Haendel konpositore eta musikariaren piezak erabili dituzte obraren bigarren zati honetan, ahotsez eta musika tresnez sorturiko piezak nahastuz. Musikaren tenpoa gero eta azkarragoa izateak azelerazioaren sentipena areagotu egiten duela adierazi du konpainiako koreografoak.

Bartzelonan du egoitza konpainiak, eta Cesc Gelabert koreografoaren eta eta Lydia Azzopardi irakasle eta jantzi diseinatzailearen abizenetatik datorkio konpainiari izena. Hamar lagunek osatzen dute dantza taldea, eta euretako bat da Gelabert.