Coppelia kalbinista

Dantza 'Coppélia'

Nahasmenaren kontua argumentuaren gaurkotzetik etorri da batez ere, gaurko gizarteko alderdirik lorrinenek -telebistako lehiaketek eta publizitateak, esaterako- gaurkotasuna eman bai, baina kategoria kendu diotelako proposamenari eta, gainera, elkarketa traketsa sortu delako Leo Delibesen suite erromantiko zoragarriarekin. Beste alderdi batzuetan, aldiz, finago ibili da proposamena, eta hasierako jantzien diseinuak eta koloreek telebistaren hastapenetako zuri-beltzeko estetika gogorarazi digute.

Dantzaren aldetik, ordea, Cisco Aznarrek ez du benetan planteatu sakontasun handiko pasarterik, edo euren balizko indarra nonbaiten galdu da, dantza garaikidearen keinuak, dantzarien oinarri klasikoa eta guztiari eman nahi izan dion pantomima-kutsua konbinatzeko ahaleginetan. Bide horretatik, koreografoak ez die behar zen beste etekinik atera eszena erromantikoei, baina trukean, zenbait une dibertigarri bizi ditugu eta dantzariek aukera batzuk eduki dituzte balet klasikoaren edertasuna erakusteko.

Batez ere, argumentuaren kontaketan tematu da sortzailea, eta istorioaren hari korapilatsua argitzearren, frantsesez, ingelesez eta gaztelaniazko solasaldi laburrak tartekatu ditu han-hemenka. Bideo-proiekzioek ere rol garrantzitsua jokatu dute, baina dantzarien atzean proiektatu direnak betegarri hutsa izan dira, eta gainera, zeharo oztopatu dute ikusleen arreta dantzariengan eta koreografiaren diseinuan zentratzea. Kontrako erara, agertoki aurrean proiektatu diren film laburrek fantasia handia erakutsi dute, bai irudietan bai melodia nagusien bertsio onirikoetan.

Atsedenaldiaren ostean desagertu egin dira dantzarien atzeko bideo-proiekzio nekagarriak, eta Luis Lararen eszenografia eta jantzi miresgarriek futurismoaren garaiko mundura eroan gaituzte. Orduantxe hasi da gauzatzen Coppelia klasikoaren berrikuskapena, eta iruditu zaigu koreografoak ere ahalegin berezia egin duela dantzaren diseinuari nolabaiteko distira emateko. Genevan kalbinismoaren sortzaileei egindako monumentuaren aurrean dantzatzea, ordea, probokazio hutsa izan liteke, edo bestela, ikuskizunaren babesleei egindako ordaina.