Bilbon Erakustazoka zegoen lekuan egingo dute azkenik Arte Eszenikoen Zentroa

Eusko Jaurlaritzaren eraikina da, eta guztira 3.180 metro koadro izango ditu eta 11 metro garai izango da

Atzera aurrerak izan ditu nagusi Arte Eszenikoen Zentroa egiteko proiektuak. 2006an, Eusko Legebiltzarrak aho batez eskatu zion Eusko Jaurlaritzari sortzeko zentroa. 2007-08ko ikasturtea jarri zion muga gisa. Aurrez, sektoreko plataformak zentroaren beharraz ohartarazia zuen.

Eskaera aintzat hartu zuen Jaurlaritzak, baina kokapena eta eraikitzeko epeak aldatu egin dira harrezkero. Besteak beste, Donostia, ETBren Iurretako (Bizkaia) egoitza zaharra eta EHU Euskal Herriko Unibertsitatearen Leioako (Bizkaia) campusa izan zituen buruan Jaurlaritzak. Bilboko Udalak, ordea, hirian nahi izan du betidanik zentroa, eta akordioa egin zuen Hezkuntza Sailarekin. Alondegiko 1.800 metro koadro eskaini zizkion Iñaki Azkuna alkateak Hezkuntza sailburu Tontxu Camposi. Iragarri zuten 2008-09ko ikasturtean abiatuko zituztela eskolak.

Lekua hitzartu bai, baina lanak ez atzera ez aurrera geratu ziren. Campos buru zuen sailaren «utzikeria» salatu zuen atzo Isabel Zelaa Eusko Jaurlaritzako Hezkuntza sailburuak. «Proiektua denbora gehiegiz egon da geldirik, eta, nik dakidanagatik, ez da Bilboko Udalarengatik izan». Agintea hartu ondotik proiektua bideratzen ahalegindu dela ziurtatu zuen Zelaak, eta ezinbestean baztertu behar izan dutela Alondegiko proiektua, ez dituelako baldintzak betetzen. Azkunak berak ere onartu du Alondegia ez dela egokiena, gisa horretako zentroak ezaugarri bereziak ditu eta. «Bote lasterrean eskaini genuen».

Alondegia baino egokiagoa

Alondegia bazterturik, Erakustazoka zegoeneko 7. pabiloian eraikiko dute Arte Eszenikoen Zentroa. Eusko Jaurlaritzaren jabetzakoa da eraikina -BECen akzio batzuen truke aldatu zuen Bizkaiko Diputazioarekin eta Bilboko Udalarekin-, eta dagoeneko hasi dute Hezkuntza Sailaren esku jartzeko prozedura. Elkarrekin lortutako bi eraikinetan egongo da zentroa, eta guztira 3.180 metro koadro izango ditu. Altueran, 11 metro. «Halako ezaugarriak dituen zentro batentzat aski izango da», adierazi zuen Zelaak.

EITBren eta Bizkaiko Ogasunaren atzealdean egongo da Arte Eszenikoen Zentroa. Biziberritzen ari den eremua da. Besteak beste, A-8ko sarrera berria eraikitzen ari dira -Sabino Aranakoaren ordezkoa izango da-, eta inguruan eraikiko dute San Mames futbol zelai berria ere. Hezkuntzaren alorrean, han dago EHUren ingeniaritza eskola. Unibertsitatearen beste hiru eraikin eraikitzeko lanak urrian hasi zituzten.

Lanen aurrekontua zehazteko dute oraindik, proiektua bera egin gabe dagoelako. Hala ere, datorren urteko aurrekontuetatik bideratuko dute dirua. Zelaak esan zuen eraikin berria egitea baino merkeagoa izango dela, oraingoa egokitzea aski baita.

Lekua erabakita, ze ikasketa eskaintza egin aztertu beharko dute. Zelaak aurreratu zuen heziketa arautua eta ez-arautua emateko asmoa dutela. Ordea, sailburuaren arabera, dena egiteko dago, aurreko sailak ez zuelako egin. Eskaintza erabakitzeko, Hezkuntza Saileko kideez eta arte eszenikoen inguruan dabiltzanez osatutako batzordea sortu dute. Arte dramatikoa eta dantza eskaintzeko asmoa du Eusko Jaurlaritzak.