Hemen zaude: Hasiera Hemeroteka Bi egun dantza jauzika

Dokumentuaren akzioak

Bi egun dantza jauzika

Dantza tradizionalaren nazioarteko Ezpalak jaialdia ospatuko dute larunbatean eta igandean

Egilea
Iñigo Astiz
Komunikabidea
Berria
Tokia
Iruñea - Eibar
Mota
Albistea
Data
2010/05/27

Gai baten inguruan egituratzen dute urtero jaialdia, eta aurten, dantza jauziak izango dira ardatz. Dantza genero propioa dira dantza jauziak, eta toki hauetan dantzatzen dituzte: Biarnon (Frantzia), Lapurdin, Nafarroa Beherean, Zuberoan eta Baztanen (Nafarroa). Eta lurraldeotako dantza taldeak izango dira jaialdian ikusi ahal izango direnak.

Izen ezberdina dute dantza horiek batean eta bestean: jauziak, sautsak, mutil-dantzak eta mutxikoak, adibidez; dantza sistema beraren parte dira denak, ordea. Berdin eta ezberdin. Eta hori ikusaraztea da jaialdiaren asmoa.

Dantza talde bakoitzak bere erakustaldia izango du, eta, ondoren, dantzaldi irekia izango da, animatzen diren guztientzat. Hala izango da larunbatean Iruñean, baita igandean Eibarren ere.

Jauzien hotsa

17:00etan hasiko da jaialdia Iruñean larunbatean, Alde Zaharreko kaleetan egingo den kalejirarekin, eta 18:00etan izango da eguneko ekitaldi nagusia. Burgoen plazan izango dira Ezpala jaialdian bildutako dantza talde guztiak beren erakustaldia eskaintzen. Eibarren, berriz, goizean hasiko da jaialdia igandean. 12:00etan kalejira izango dute Urkizutik Untzagara, eta 12:30ean ikusi ahal izango da han dantza taldeen erakustaldia. 17:00etan, gainera, erromeria izango da.

Aiko musika taldea ariko da musika jotzen jaialdi guztian. Urraska. Dantza jauziak Sagasetaren bidetik izeneko diskoaren aurkezpen moduko bat egiten ibiliko dira, gainera. Lan horretan bildu dute 70eko hamarkadan Miguel Angel Sagaseta ikerlariak Luzaide inguruan (Nafarroa) bildutako jauzien errepertorio osoaren interpretazio musikala. Liburuxka, DVDa eta urrastegiarekin osatu dute CDa.

EZPALAK DANTZA JAIALDIA

Noiz. Larunbatean, 17:30ean, Iruñean, eta igandean, 12:00etan, Eibarren (Gipuzkoa).

Non. Alde Zaharreko kaleetan eta Burgoen plazan Iruñean, eta Untzaga plazan Eibarren.

Dokumentuaren akzioak