Balletaren unibertsoari itsatsita

Urte eta erdiz ballet dantzariekin batera eta bestera ibili ondoren, Endika Portillok 'Coda' liburua argitaratu du

Dantza edo musika piezaren amaiera da koda, eta orain dantzarien azken ikasturtearen emaitza eta Portilloren arte ikasketen amaierako proiektua ere bada. «Puntu berean elkartu gara. Euren azkeneko ikasturtea izan da maila profesionalera bidean eta nire ikasketen etapa bat ere amaitu egin da».

Gasteizko Arte eta Diseinu Eskolan zegoela, Jose Uruñuela dantza eskolara joateko aukera izan zuten ikasleek, eta bisitaldi haren ostean bururatu zitzaion Portillori argazki erreportajea egitea. Azken ikasturteko dantzariei itsasita egon da, gau eta egun.

Erabateko askatasuna izan du dantzarien egunerokoan murgildu eta une intimoenak kamerarekin jasotzeko. «Ez da zaila izan taldea ohartu gabe eguneroko saioetan aritzea. Diziplina handia dute, eta oso kontzentratuta daude euren lanean», azaldu du Portillok. Ikasleak 18 eta 19 urte bitartekoak dira, sei bat ordu egin behar dituzte egunero dantza entseguetan, eta gauez egin behar izaten dituzte euren ikasketak. Portillok azaldu bezala, parez pare zabaldu dizkiote ateak, eta beste taldekide bat izan da.

Argazki klasikoak

Zuri-beltzean jaso nahi izan ditu dantzarien eszenak, eguneroko kontakizunari are eta indar handiagoa emateko. «Ballet klasikoa izanik zuri-beltza hobeto egokituko zela uste nuen, eta, gainera, momentu hartan erosoago sentitzen nintzen argi eta ilunak erabiltzen, konposizio aldetik».

Liburuak ez du jarraipen kronologikorik, momentu eta irudipenek josten dute. «Argazki bakoitzak irakurleari esaten dionari jarraitzea proposatuko nuke, ez zen nire asmoa hasieratik amaierara istorioa kontatzea». 34 argazkik osatzen dute bilduma, hainbat orri zuri ere tartekatuta. «Argazkien bitartez gorputz eta ariketen indarra eta dantzaren samurtasuna erakutsi nahi izan dut». Ordu askotako lana eta ahalegina agertoki gaineko fintasun eta edertasunarekin alderatuta.

Beroketa ariketak, puntekin egin beharreko saioak, jantzi eta makillaje prestaketak. Argazki gehienak entseguetan egin ditu, baina baita aldagela, emanaldi eta bidaietan ere. «Argazkiren bat edo beste egiteko eskatu diet modu batera jartzea, baina gehienak saioetakoak dira, lanari zor zaion errespetuagatik».

Principal Antzokia, Amurrio antzokia, Getxo antzokia. Agertoki nagusienetan eta Araban barrena, herriz herri, ibili zen dantza taldearekin batera. «Ezagutzen ez nuen mundua zen niretzat balleta. Esperientzia aberasgarria izan da, bai profesionalki, eta baita pertsonalki ere. Erronka zen niretzat».

Irudiekin oreka bilatzen saiatu da Portillo, harentzat estetikoki interesgarria dena eta dantzarientzat ere esanguratsua dena tartekatuta. «Niretzat ederrenak direnak, atmosfera berezia dutenak, argi eta ilunekin jokatzen dutenak, eurentzat ez dira interesgarrienak. Guztion interesak biltzen saiatu naiz». Liburuaren 1.500 ale argitaratu dituzte, eta argazkilariaren webgunen eska daiteke: www.endikaportillo.com. Gasteizko Zuloa eta Zallako Garoa liburu dendatan ere aurki daiteke. Liburuarekin batera, erakusketa ere prestatu du, eta irailetik aurrera hainbat herritan izango da.

Bien bitartean, egitasmo berriekin hasi eta argazkilaritza artistikoko masterra ikasten ari da Portillo. Hainbeste denbora proiektu berarekin «buru-belarri» ibili ostean, bide berriei ekin die. «Klasikoa ondo dago, baina beste kolore eta teknikekin probatu nahi dut».