Aulki bat kultur politiketan

Euskal Kultur Erakundeak bere eragina handitzeko asmoak berretsi ditu 20 urteak betetzearekin

Mikel Erramuzpe EKEko lehendakariak hartu zuen hitza horrek zer erran nahi duen azaltzeko: «Instituzio eta kultur ahamenak dituzten kolektibitate guztien kultur politiken moldaketan parte hartuko du EKEk». Erran nahi baita: «Adibidez, musika hezkuntza. Kontseilu Nagusiaren ardura da hori. Bada, hemendik aitzina, aulki bat izanen du hor EKEk. Instituzio batek kultur politika bat landu beharko duelarik, aholkulari lana bete eta ideiak emanen dikzio EKEk. Kultur elkarte eta sektore iganarazi diotenaren arabera, erraten ahalko du: 'Hara zerren beharra dugun'. Orduan, kultur politika publiko horiek antolatuko direlarik, naturalki, euskal kultura kontutan hartuko dute. Hasteko, gaur egun baino hobeki».

Lehendakariak argi du horrek lagunduko duela euskal kultura: «Euskal kultura bereizketatik jalgiaraziko du. Orain arte artista eta elkarte anitzek arazo honi aurre egin behar dute ardura: 'A! euskal proiektu bat da, ba, zoaz EKEren ikustera'. Euskal kultura normaltasunean sartzea da xedea. Ez da arraroa den zerbait, normala izan behar du».

Horren gauzatzeko langile berri bat hartuko du aurtengo irailean EKEk. Zehazki zer egin beharko duen gogoetatzen ari dira partaide guztien artean mementoko. Uztailean zabalduko du lanpostu berri horren deialdia. Hortaz, Pantxoa Etxegoien, EKEko zuzendariak, azalpen batzuk ekarri zituen: «Gure helburua politika publikoetan laguntzaile izatea da euskal kultura gehiago onartua izan dadin, baina bistan dena ez dugu erabakiko erakunde horientzat. Lagunduko ditugu, eta ahal bezain bat baliabide iturri izanez». Emeki baina segurki aitzinatzeko xedearekin, «esperimentazio batekin hastea» erabaki dute, eta gaia euskal dantza hautatu dute. Bizpahiru hilabete iraunen duen esperientzia, Iparraldeko Dantzarien Biltzarrarekin partaidetza hurbilean, eta baita Frantziako dantza zentroaren laguntzarekin ere.

Hogei urte iragan eta gero, hau

EKEk 20 urte beteko ditu aurten, eta biltzar nagusiaz baliatu ziren horren gogoratzeko. Ez dute beste munduko ospakizunik egiteko asmorik, baina 20 urte bete eta norabide berri hori gauzatzen hastearekin EKEk «urrats berri bat gainditu» duela esan zuen Erramuzpek. Ramuntxo Camblongek eta Erramun Baxok, EKEko lehendakari izanak, orain arte egin bidea azaldu zuen gaur egungo egoera baikorki baloratuz. Baxokek gehitu zuen «gero ederra daukala», ez badu «ahanzten nondik heldu den eta zein diren bere erroak, hau da, elkarteen kultur dinamismoa».

Frantxua Maitia Akitaniako Eskualdeko Kontseilua eta Max Brisson Pirinio Atlantikoetako Kontseilu Nagusiaren izenean mintzatu ziren. Jean Rene Etxegaraiek, EKEri laguntza handia ekartzen dion euskal kultura sostengatzen duen herrien arteko sindikatuaren lehendakariak, ondoan zuen Phippe Rey prefetari gogorarazi zion hizkuntza gutxituen lege babesaren premia. Prefetak ez zion erantzun horri. Existitzen diren instituzioak biziaraztea dela lehenta- suna azpimarratu zuen, eta EKEren lanaren balorazio «biziki ona egin» zuen. Goraipatu zuen behin eta berriz EKEren «profesionalismoa, serioa eta fidagarritasuna».

Bizkitartean, biltzar nagusia 2009ko kontuen azterketarekin hasi zuten, aho batez onartua. 685 eurorekin bururatzen du 940.286 eurorekin hasi urtea, hau da, 2.008an baino 98.010 euro gehiago. Orotara 360 ekintza bultzatu edo lagundu ditu EKEk urte osoan.