Hemen zaude: Hasiera Hemeroteka Askotariko dantzen erakustaldia

Dokumentuaren akzioak

Askotariko dantzen erakustaldia

Egilea
Ekaitz Herrera
Komunikabidea
Berria
Tokia
Bilbo
Mota
Albistea
Data
2009/08/19

Oholtza gainera igo da Txerreroz jantzitako dantzaria, zaldi ilez egindako erratza eskuan duela. «Arratsalde on, eta mila esker etorri zareten guztioi. Hasi egingo dugu gaurko dantza ikuskizuna», dio. Badirudi jendeak euskal dantzen erakustaldia ikusteko grina duela, eta txalo zaparrada batekin ekin diote ikuskizunari.

Urtero legez, Bilboko Plaza Barria euskal folklorearen erakusleihoa da jaietan. Domekan hasi, eta zortzi egunez euskal dantzen emanaldiek ez dute etenik. Arratsaldeko zazpietan hasi ohi dira saioak, eta dantza talde askok hartzen dute parte urtero. Ondoren, zortzietan, erromeria eta larrain-dantza izan ohi dira, Bizkaiko Dantzarien Biltzarraren eskutik. Adinekoak izan ohi dira ikusle gehienak, baina zenbait gazte ere egon ohi da han-hemenka. Azken finean, giro herrikoia nabaria da.

Lau horma arkupedunen artean, eta Euskaltzaindiaren egoitza azpian, Beti Jai Alai dantza taldeko kideek ere (Basurtu, Bilbo) hasi dute ikuskizuna. Txirula eta ttunttun doinuek hartu dute plaza. Zuberoako dantzei ekin diete kideek, eta txoko batetik plazaren erdigunera abiatu dira dantzariak, musikaren erritmoan, ilaran. Hala, Zamaltzainak piztu du arreta handiena, zaldi itxurako jantzia daramala ikusleak erakarri baititu. Era berean, ikusmira sortu du godalet-dantzak, ardo edalontziaren gainean aritzeak abilezia eskatzen duelako. Argazki kamerak berehala atera dituzte zenbaitek, edalontzi gainera igotzen direneko jauziak harrapatu ahal izateko. Irauliko ote da basoa? Ez. Jendearen oihuek eta txaloek animatu dute giroa, eta Entseinariak eskuan daraman Zuberoako bandera astindu du, emanaldiaren lehen zatia agurtzeko.

Gipuzkoako dantzek hartu dute lekukoa. Taldeko kapitaina buru dutela, plazara irten dira neskak, eta ederki dantzatu dute zinta dantza. Orduan, dantza taldeko bi kidek bina makila txiki banatu dizkiete dantzariei, eta makil dantza eskaini dute, olgetan baleude bezala makilak astintzeko.

Halako batean mehatxu egin du zeruak. Kolore goibela da lainoetan, eta zirimiria hasi du Plaza Barriko ikuskizunean. Halere, emanaldian aurrera jarraitu dute dantzariek, Durangaldeko dantzak dantzatuta. Agintariena dantzatu dute lehendabizi, eta segidan etorri dira zortzikoa, ezpata joko txikia, banakoa eta makil jokoa. Durangaldeko dantzak txotxongiloarekin amaitu dituzte, taldeko kide bat zerura begira jasota.

Azkenik, Lesakako dantzak eman dituzte. Plaza Barriak ez du Lesakako zubi ezagunaren antzik, baina ederto moldatu dira, dantza egiteko lekua sobera izanda. Irrintziren bat edo beste bota dituzte kideek, baina nekez lortu dute giroa berotzea, zirimiria ari baitzuen etengabe. Alabaina, arin-arina eta fandangoa dantzatutakoan, zertxobait alaitu da giroa.

Azken txalo zaparrada etorri da, eta emanaldia amaierara iritsi da. Ikusleak erruz altxatu dira eserlekutik, eta euripetik alde egin dute guztiek. 

GAUR

13:30. Bertso bazkaria, Arkaitz Estiballes eta Iker Zubeldiaren eskutik.

19:00. Euskal dantzak. Salbatzaile taldea (Olabarrieta).

20:00. Erromeria eta larrain-dantza.

00:00. Errumaniako Ciocarlia Fanfarrearen emanaldia.

BIHAR

19:00. Euskal dantzak, Alkartasuna taldearekin (Bermeo).

20:00. Erromeria eta larrain-dantza.

00:00. Galiziako Mercedes Peon taldea.

ETZI

19:00. Euskal dantzak. Urdaibai taldea (Forua).

20:00. Erromeria eta larrain-dantza.

00:00. Troveros de Asieta taldea (Kanariar uharteak).

ETZIDAMU

19:00. Euskal dantzak. Mikel Deuna taldea (Iurreta).

20:00. Erromeria eta larrain-dantza.

00:00. Reggae musika: Twinkle Brothers (Jamaika).

Dokumentuaren akzioak