Artearen galderak plazaratuko ditu Lekeitioko Kale Antzerki Jaialdiak

Ostiraletik igandera bitartean, zortzi antzezlan eta dantza ikuskizun taularatuko dituzte herriko kaleetan

Jaialdiaren 22. ekitaldia izango da. Urtero bezala, artea eta jai giroa kalean barreiatuko dira, nazioarteko eta euskal antzerki taldeen eskutik. Clown-a, akrobazia, dantza garaikidea, sua, umorea eta poesiaz jositako lanak izango dira, eta horiez guztiez gozatu ahalko dute Lekeition biltzen direnek. Kale antzerkian aitzindari da jaialdi hori, eta aurrerantzean ere eredu izan nahi duela azaldu zuen Agirrek.

Sarrionandia oinarrian

Lekeition, ume, gazte zein helduentzako lanak izango dira ikusgai. Guztira zortzi talde arituko dira euren lan berrienak plazaratzen, eta horien artean jaialdiak ekoizpen propioko bederatzigarren lana aurkeztuko du asteburuan: Sarritsasoa. Dantzaz konpainiarekin batera ekoitzitako lan horrek Joseba Sarrionandiaren poesia du oinarri, eta dantza garaikidea, literatura eta ingurugiroa uztartzen ditu; Isuntzako hondartzan taularatuko dute.

Filgi Claverie Dantzaz konpainiako zuzendariak azaldu zuenez, jaialdirako sorkuntza lan bat egiteko eskatu zietenean, ez zuten birritan pentsatu, kokalekuak dantzarien lana asko zailduko bazuen ere. «Dantzarientzat aldaketa handia izan da, espazio txiki batetik hondartza batera aldatzea zaila delako».

Sarritsasoa lanean, Lekeitioko Karkabia kultur elkarteko hamabi dantzarik eta nazioarteko beste hamarrek hartuko dute parte. Antolatzaileek hasieratik izan zuten argi proiektuan lekeitiarrek ere parte hartu behar zutela.

Sua izango da aurtengo jaialdiko beste protagonista. Herrialde Katalanetatik etorritako Scura Splats taldeak correfoc suzko kalejiran txinparten azpian dantza egiteko gonbitea egingo die ikusleei.

Scura Splatsek eta Generik Vapeur Marseillako taldeak (Frantzia) jaialdiaren gaueko eta formatu handiko ikustaldi biak eskainiko dituzte. Katalanak ez dira berriak jaialdian, 2009. urtean arrakasta handia izan baitzuen haien emanaldiak.

Oraingoan, Heriotzaren dantza ikuskizunaren euskarazko bertsioa estreinatuko dute. Ez da izango taldea euskaraz aritzen den lehenengo aldia, Lekeition izandako aurreko aldian ere gure hizkuntzan eman baitzuten.

Sua eta otsoak

Suarekin jolasean ere, Generik Vapeur taldeak urdinez margoturiko gizon-emakumeak ekarriko ditu portura. Handik herria zeharkatuko duen martxa bat hasi, eta ikusleekin harreman berezia lotuz joango dira.

Lekeitioko kaleek Hamelinen antza hartuko dute Deabru Beltzak taldearen eskutik. Maiatzean Ingalaterran estreinaturiko The Wolves ari da aurkezten talde bilbotarra Euskal Herrian. Suzko emanaldi batean piano jotzaile ibiltari batek otso erraldoi talde bat eramango du kalejiran.

Eidabe taldekoek, berriz, umeentzako festa erraldoi bat antolatuko dute. Nazioarteko dantza eta jolasak plazaratuko dituzte Kanpanolue 11 salto gehiago emanaldiarekin.

Azkenik, Uruguaiko kideek osatzen duten Trapu Zaharra konpainia, Japoniako Ojarus clown taldea eta Chipolatas eskoziar taldea ere Lekeitioko plaza eta kaleetan ibiliko dira irribarreak lapurtzeko asmoz.