Hemen zaude: Hasiera Hemeroteka Arte eszenikoen eskolak bost gradu eskainiko ditu Bilbon

Dokumentuaren akzioak

Arte eszenikoen eskolak bost gradu eskainiko ditu Bilbon

2012-2013an irekiko dute, eta lehen urtean Dantzako gradu bat eta Arte Dramatikoko beste bat izango dira soilik

Egilea
Irune Berro
Komunikabidea
Berria
Tokia
Bilbo
Mota
Albistea
Data
2010/07/02

Halaber, eskolak martxa hartu ahala Arte Dramatikoan beste bi gradu ere emango dituzte: Zuzendaritza eszenikoa eta dramaturgia eta Eszenografia. Dantzan, orobat, Interpretazioa eta Koreografia gradua eskainiko dute.

Horretaz gain, Lanbide Heziketako goi mailako modulo bat ere emango dute, Eszenoteknia teknikariak trebatzeko. Ikasketa horiek egiten dituztenak zuzeneko ikuskizunetako arlo teknikoan lan egiteko trebatuko dituzte. Emeki-emeki joango dira graduak gehitzen, eskolaren jarduna egonkortu eta eskaerak gora egin ahala.

Goi mailako eskolaren inguruko lehen xehetasunen berri Eusko Jaurlaritzako Hezkuntza sailburu Isabel Zelaak eman du asteon. Eszenika izango du izena, eta Basurtuko Bami deritzon eraikinean zabalduko dute, besteak beste, Bizkaiko Foru Aldundiaren Ogasuna eta EITB eta zenbait hedabideren egoitzak dauden eraikuntzan bertan.

Eskola eratzeko lanek bospasei milioi euroko kostua izango dute, Zelaak jakinarazi duenez. Eta 2011ko lehen hiruhilekoan hasiko dituzte. Urte osoan irautea espero dute, eta 2012ko irailerako prest izatea. Eskolak 4.000 metro koadro izango ditu, eta bi solairu. Ikasgelak, lantegiak, agertokiak eta irakasleen bulegoak egongo dira bi solairu horietan.

«Eredu eleanitza»

Arte eszenikoen sektoreko profesionalen aspaldiko eskakizuna asebetez sortuko du Jaurlaritzak Arte Eszenikoen Goi Mailako Eskola. Sektoreko profesionalek eta Hezkuntza Saileko ordezkariek osaturiko mahaia ari da ikasketen curriculuma jorratzen.

Arte Dramatiko zein Dantzako graduren bat ikasteko, batxilergoko ikasketak eta unibertsitatean sartzeko hautaproba gainditurik izan beharko dute ikasleek, edo 25 urtetik gorakoentzako unibertsitaterako sarbidea. Ez hori bakarrik, Eszenikan ikasi gura dutenek proba espezifiko bat ere gainditu beharko dute.

Oraindik ziurra ez den arren, lehendabiziko ikasturtean, 25-30 bat ikaslerentzako tokia eskaintzea espero dute. Eta, Zelaak aurreratu duenez, «graduondokoak eta doktoretzak eskaintzeko bokazioa izango du Eszenikak». Horretarako, baina, graduen eskaeraren bilakaera aztertu nahi dute. Hau da, ikusi nahi dute gradua bukatzen dutenak zein graduondo ikasteko prest dauden. Hori guztiori, ordea, aztertzeko eta zehazteko dago oraindik.

Baita graduak eta goi mailako modulua zein hizkuntzan emango dituzten ere. Dena dela, Eszenikak «eredu eleanitza» izango duela nabarmen dute Hezkuntza Saileko iturriek. Arte Dramatikoko Interpretazioa gradua euskaraz ziurtatuko dutela esan dute, eta gainerakoak ingelesez ere emateko aukera aztertzen ari direla.

Ikasketak

 

GRADUAK

 

 

Arte Dramatikoa.

Graduak izaki, lau urteko ikasketak izango dira denak, 240 kreditukoak. Hiru espezialitatate izango dira: Interpretazioa, Zuzendaritza Eszenikoa eta Dramaturgia eta Eszenografia. Interpretazioa lehen ikasturtetik bertatik eskainiko dute; aldiz, Zuzendaritza Eszenografikoa eta Dramaturgia, 2013-14 ikasturtetik aurrera. Eszenografiari dagokion gradua eskaeraren arabera erabakiko dute eskaini edo ez.

 

Dantza.

Lau urteko ikasketak izango dira, 240 kreditukoak. Bi espezialitate egongo dira: Koreografia eta Interpretazioa eta Pedagogia. 2012-13 ikasturtean, Pedagogia baino ez dute eskainiko. Koreografia eta Interpretazioa eskaeraren arabera ezarriko dute hurrengo ikasturteetan.

 

GOI MAILAKO MODULUA

 

 

Eszenoteknia teknikaria.

2012tik aurrera eskainiko dute. Ez dute erabaki, baina, ziurrenik, urte biko ikasketak izango dira.

Dokumentuaren akzioak