Arraunak dantzari

Zientzia eta dantza. Bi mundu, Hendaiako Abadia eremuan uztartzen ari direnak bi aste hauetan Mugimenduan izeneko proiektuaren barnean. Art and Project sorkuntza garaikidea sustatzeko lanean ari den elkarteak bultzatu eta Abadiako Adiskideak elkarteak, zeina Abadiako eremuaz arduratzen den, antolatua du. Izan ere, orain arte, arte ederretan murgildu artisten egonaldiak proposatzen bazituen ere, elkarteak lan esparrua zabaltzea erabaki du. Horra, beraz, bi egonaldi berezi. Bata dantzari eskainia, eta bestea, zientziari. Biek Abadia eremuko Nekatoenea baserri ohia dute egonleku. Emaitza, Batteleku batean izeneko sorkuntza, Hendaiako Antzerkiaren Maiatza jaialdiaren karietara aurkeztuko dute, maiatzaren 29an, Hilen Monumentuaren ondoko plazan. Ondotik, beste leku batzuetan emateko esperantza daukate.

Dantzari dagokionez, Mikel Aristegi koreografoa da proiektuaren buru. Eneko Gil eta Silvana Suarez Cedeño dantzariekin osatzen du hirukotea. Zientzia arloan, Stephanie Fance etnologo eta ikerlaria dago Nekatoenean. Materiarik gabeko itsas ondarearen inbentarioa egiten ari da memento honetan, Lapurditik Landetako Capbretoneraino. Gaur egun transmititua dena aztertzen du, baita teknikak, eraikuntzak, lasterketak ere. «Ez dugu bakarrik objektua bilatzen, baina bai horretan oinarritzen diren praktikak».

Bi munduak auzo, naturalki aurkitu dute elkarrekin aritzeko aukera. Dela zientzien begietatik, dela dantzatik, Aristegi zein Fance, biak atxikiak dira memoriari. Fancek du ukan battelekuaren (batel tradizionala) ideia, eta koreografoak segituan bereganatu du. Izan ere, aita arraunlaria du Aristegik, Espainiako txapelduna izana eta Olinpiar Jokoetara ere joana, eta, ondorioz, txikitatik aritu da arraunean. «Mugimendua gorputzean barneratua izateaz gain, mugimenduak segidan inspiratu nau», adierazi du.

Bideo eta argazkiei begira egon da ondotik, baina laster irudimena utzi du askatzera. Joan den astean hasirik, Gil eta Suarez Cedeñorekin batera egunero ari dira horretan. Ikerlaria hortxe daukate, argazkiak hartzen egunez egun. Fancek bizi-esperientzia paregabea dela deritzo: «Gai bera ikuspuntu arras ezberdinei irekitzeko aukera ematen du». Lehenik mailez hasi da komunikatzen koreografoarekin. Battelekuaz interesaturik agertu zaiola Aristegi, horretaz zekiena eman dio, «baina nik proposatzen diodana berezia den bezala, hark gero ondotik beste zerbait ekarriko du».

Dantzariekin ikasi duena bezala, oro har egonaldiaren karietara ezagutuarekin biziki kontent da zientzia ikerlaria: «Ohiz kanpoko trukaketa horiek dute egiten leku honen magia». Dela Abadiako adiskideena edo besteena, «gauzak baloratu eta memoria atxikitzeko gogo hori. Hori guztia proiektu komun batean elkar aurkitzea bikaina da».

Zientziaz eta dantzaz gain, beste zenbait arte ere presente dira sorkuntzan. Musikan, Xanok espresuki sortutako giroa. Jantziak, Francisco Dussourdek asmatuak ditu. Eta bururatzeko, Iñigo Aristegiren eskulturek ere osatuko dute sorkuntza.