Ari du euria, egin dantza Oinkarirekin

Izenburu 'sinplea' jarri diote ikuskizun berriari Oinkarikoek, baina beraientzat «erronka handi bat izan da, exijentzi maila handiagoa baitu guretzat». Izan ere, Korron-tzi talde bizkaitarrarekin aritu eta gero, Villabonako taldea «beste maila batean kokatu gara. Guretzat aukera paregabea izan zen eta hor egon gara lan handia egin eta gero».

Orain, maila honi eutsi nahi diote Villabonako dantza taldekoek eta azken asteotan, entsaiatzeko duten lokalean sartu-atera dabiltza parte hartuko duten 80 dantzariak. «Jendea harrituta dago erabat bueltaka gabiltzalako. Batzuk ez bagara besteak entsaiatzen ari gara. Ikusikizun honetan dantzari askok hartzen dugu parte eta denontzat tokirik ez dugunez banatu egin dugu denbora. Dugun tartea ondo aprobetxatu behar dugu eta hortan saiatzen ari gara». Mugimendu horrek ikusmina ere sortu du herrian. «Jendeak galdetzen digu zer egin behar dugun» baina oraingoan Oinkarikoek gorde egin nahi omen dute sekretua.

Esan daitekeena da euren filosofia jarraituz, dantza tradizionalak ikusi ahal izango direla. «Oso ezagunak ez direnak eskainiko ditugu». Horien artean, Berastegiko San joan dantza eta gero, bestelakoak ere izango omen dira, beti ere euri ardatz hartuz. Ikuskizuna presta-tzerakoan Oinkarikoek Edu Muruamendiaraz zuzendaria izan dute ondoan eta Juan Kruz Igarabide idazlea. Bi zutabe garrantzitsu ikuskizun berri eta «ikusgarri» bat eskaini nahian. «Euriak erritmo bereziak ditu. Ez da berdina ekaitza edo sirimiria egiten duenean euriak ateratzen duen zarata. Hori kontuan izanik dantza ezberdinak egin ditugu Eduren laguntzarekin eta gero, poesi ezberdinak aukeratu ditugu Juan Kruz Igarabideren laguntzarekin».

Tolosako estrenaldian jantzi bereziak izango dituzte Lourdes Esnaolak prestatuak. Horiek ere gordeta dituzte Oinkarikoek, emanaldian dena ikusgarrigoa izan dadin. Musika zuzenean izango da. Garazi Esnaolaren zuzendaritzapean arituko dira bederatzi musikari, eta hauek osatutako doinuen gainean eskainiko dituzte Oinkariko 80 dantzariek beren pausuak. Oraingoan argien efektua ere garrantzisua izango dela azaltzen zuen Gurrutxagak. Carlos Solanok eginiko argiztapenaren diseinua ikusiko da emanaldian.

Gogotsu daude Oinkari dantza taldeko kideak oholtza gainera igo eta ikuskizuna eskaintzeko. «Lan handia egin dugu. Ordu asko sartu ditugu eta uste dugu merezi duela egin dugun esfortzu guztia». Garbi dutena da dagoeneko, estreinatu baino lehen, hitzorduak jarriak dituztela euren emanaldia eskaintzeko: Zizurkil, Oiartzun, Villabona...

DATUAK