Antzuolako dantzen jatorria zein den eta bertako dantzek dauzkaten aldaerak zeintzuk eta nolakoak diren aztertu ahal izan zituzten zapatu goizean Torresoroan, Mikel Sarriegi dantzari eta ikertzailearen eskutik izandako mintegian.
Hasteko, arlo teorikoan jarri zuten arreta, eta gero, adibide praktikoak ere jarri zituzten, Antzuolako dantzak oinarri hartuta.
Publikoan, Antzuolako hainbat dantzari izan ziren, dantzekiko interesa zuten herritarrak ere bai, eta kanpoko beste herri batzuetatik ere etorri ziren beste dantzari batzuk Sarriegik esandakoak entzutera.
Mintegiaren amaieran, bertaratutako ia guztiak dantzan jarri ziren. Antzuolako bi zortziko dantzatu zituzten, baina hiru aldaera desberdinekin. Izan ere, batzuk Antzuolako eran dantzatu zuten, beste batzuk Donostiako eskolaren arabera, eta Sarriegik berak Beasaineko eskolaren arabera egin zuen dantza. Bertan ikusi ahal izan zen aldi berean dantzatuta zein aldaera desberdin dauden hiru eskola horietako bakoitzean. Sarriegik azpimarratu zuen aldaera horietako bakoitza aberasgarria dela.
