Ikusi gehiago
Albokarien topaketa batek emango dio hasiera egunari, 11:30ean, Kurtzeko plazan. «Albokari guztiak biltzeko tartea izango da, eta hainbat produktu izango dira eskuragarri: liburuak, diskoak, albokak...», adierazi du Eguskizak. Ondoren, Mariano Barrenetxearen alboka mundua. Eskuizkribuak ikertuz liburua aurkeztuko du Manu Gojenola idazle eta ikertzaileak, 12:00etan. Aurkezpenaren ostean, albokariek kalejira egingo dute Galdakaoko kaleetan. 14:30ean, herri bazkaria izango da, eta 16:30ean, mikro irekiko saio bati ekingo diote. «Nahi duenak prest izango du mikrofonoa, abestiren bat jotzeko». Kontzertuekin amaituko da eguna: Karlos Subijana ariko da 17:30ean, eta Eingo taldeak dantza plaza eskainiko du, 19:00etan. Kontzertu bien artean, alboken eta liburuen zozketa egingo dute.
«Belaunaldi berriek ez dute gertu sentitzen Euskal Herriko kultura. Halako mundu globalizatu batean, gehiago ari dira kanpora begira edo kanpotik datorrena kontsumitzen, eta horrek gurea den hori alde batera uztera eramaten ditu»
JON EGUSKIZAGaldakaoko Andra Mari dantza taldeko kidea
Eguskizak azpimarratu duenez, dantzariei eta albokariei ikusgaitasuna emateko eguna izango da. Hain zuzen, albokaren eta euskal dantzen pertzepzioa okerrera doala ziurtatu du Andra Mariko kideak: «Belaunaldi berriek ez dute gertu sentitzen Euskal Herriko kultura. Halako mundu globalizatu batean, gehiago ari dira kanpora begira edo kanpotik datorrena kontsumitzen, eta horrek gurea den hori alde batera uztera eramaten ditu». Alde horretatik, uste du ezinbestekoa dela ulertzea Euskal Herriko tradizioen oinarri nagusia hizkuntza, musika eta ohiturak direla. «Sarritan, geurea den hori modu arkaiko batean antzematen da, zaharkitutzat jotzen da. Baina ohartu dugu gara horrek egiten gaituela euskaldun».
Ikusgaitasunaren beharra
Alboka zehazki noiz sortu zen ez dakite, baina, Aita Donostiak euskal musika tresnei buruz idatzi zuen liburuaren arabera, XV. mendearen erdialdeko dokumentuetan aipatu zuten lehen aldiz. «Alboka da Euskal Herriko musika tresnarik arkaikoenetariko bat; artzainen munduarekin oso loturik dago. Antzinako soinu mistiko bat du, eta alboka entzuteak garai horietara eramaten gaitu. Zerbait hipnotikoa da», esan du Eguskizak. Jotak eta porruak dantzatzeko erabili den musika tresna da, baina, egun, beste arlo batzuetan ere erabiltzen da: «Zenbait musika talde eta artistak erabiltzen dute, hala nola Juan Mari Beltranek, Ibon Koteronek eta Kepa Junkerak, Albokak, Kherak... Eta folk eremutik ere irtetea lortu du; Exkixu edo Zetak taldeekin, esaterako».
Hala ere, Eguskizak ziurtatu du Euskal Herrian ez dagoela alboka ikasteko eskola askorik. Trikitia ez bezala, esan du alboka jotzen ikastea «aski zaila» dela, eta uste du erakundeek musika tresna horri ikusgaitasuna emateko ekitaldi gehiago egin beharko lituzketela. «Musika eskoletan alboka egotea da garrantzitsuena, jendeak ikasteko aukera izan dezan. Musika eskola gutxitan lantzen da alboka, eta, sarritan, alboka topatzeko edo ikasteko aukerak ez dira errazak izaten».
Galdakaoko Andra Mari taldeak alboka erabiltzeko ekitaldiak sustatzen jarraituko du. «Alboka erabiltzen jarraitu behar dugu, euskara bezala. Dantza saioetan edo antolatzen ditugun ekintzetan albokak presente egon behar du. Jendeak ikusi behar du musika tresna hori hortxe dagoela, gurea dela eta zaindu egin behar dugula».
