«Mundu teknologikoaren aurrean biluztasunaren estrategia aukeratu dut»

Juschka Weigel. Dantzari eta koreografoa

Juschka Weigel dantzari alemaniarraren (Dortmund) Frecuency I lana ikusteko aukera egongo da gaur, 20:00etan, Bilboko Fundicion aretoan. Mundu teknologikoaren sasiordenan gizabanakoak duen bizimoduaren inguruko hausnarketa egiten du, bakarkako lanean. Japoniako butoh dantza espresionistaren eragin handia onartzen du koreografoak.

Butoh dantza estiloa itsusia iruditzen zaio jende askori; zergatik interesatzen zaizu zuri?

Butoh konpainia batean aritu nintzen Berlinen, Anzu Furukawa dantzariarekin. Hura Tatsumi Hijikata butoh dantzaren sortzailearen ikaslea izan zen. Butoh dantzak beste era batera ikusten ditu gorputza eta bizitza. Mendabaldean, kanpokotik barrura dantzatzen gara. Asian, berriz, barrutik kanpora dantzatzen dira. Horregatik interesatu zitzaidan horrenbeste. Indonesian ikasi nuen lehen aldiz barrutik kanpora dantzatzen.

Bigarren Mundu Gerrako zaurien inguruko erreakzioz sortu zen dantza mota hori Japonian. Zer zentzu du horrek gaurko Europan?

Aurten 50 urte bete ditu butoh dantzak; beraz, arte gaztea da, Mendebaldeko balletarekin parekatuta. Japonian No antzerkia eta kabuki dantza egiten zuten, eta horien estetika oso ederra da. Butoh dantzak egin zituen Asian lehen aldiz ezinbesteko galderak: non dago zahartzaroa, gaixotasuna, heriotza, itsusia... bizitzaren alde iluna? Japonian butoh sortu zen garai berean, Alemanian ikasleen iraultza gertatu zen. Nik ez dut Asiako butoh egiten, baizik eta Europakoa.

Nola agertzen da ezinegon hori Bilbon aurkezten ari zaren Frecuency I lanean?

Gizakiaren mugimenduak eta pentsamendua mugatuta daude mundu teknologiko honetan. Gizaki estatikoa esango nioke nik. Egoera horren aurrean, biluztasunaren estrategia erabiltzen dut, larrutzearen metafora gisa. Alde batetik, biluztasunak giza gorputzaren hauskortasuna adierazten du, eta bestalde, gizakiok bizitzan zehar hainbat larruazal janzten ditugula erakusten du; pertsonalitatearen mozorroa eraldatzeko dugun ahalmena, alegia. Agertokian bakarrik agertzeak nabarmendu egiten du biluztasuna. Halere, gustuko dut bakarrik aritzea. Aldi berean, gustuko nuke dantzari askorentzako piezak egitea, baina horiek sortzea diru eta politika arazoa da.