Hemen zaude: Hasiera Hemeroteka «Flamenkoari zor diot naizena»

Dokumentuaren akzioak

«Flamenkoari zor diot naizena»

Eva Yerbabuenak orain arte bakarka sortutako pieza guztien bilduma eskainiko du gaur Euskaldunan

Egilea
Irune Berro
Komunikabidea
Berria
Tokia
Bilbo
Mota
Albistea
Data
2009/04/19

«Beharbada ezin dezaket esan flamenkoa nire bizitzeko modua denik, ez baitut bizi garai bateko artista handiek bezala. Haiei esker hazi da flamenkoa, eta iritsi da gaurko egunetara», adierazi du Yerbabuenak. Flamenkoa dantza garaikidearekin uztartzeak eraman du Yerbabuena munduko hainbat herritan dantzatzera. 1970ean Alemanian jaio zen arren, Espainiako hegoaldean, Andaluzian hazitakoa da. Umetatik agertu zituen dantzarako trebezia eta interesa, eta bere kabuz eman zituen lehendabiziko pausoak. 1998an sortu zuen bere konpainia, eta, harrezkero, koreografia ugari sortu ditu dantza tradizionala garaikidearekin batuz, flamenkoa mugara eramanez eta adierazpide berritzaileak sortuz. Pina Bausch eta Carolyn Carlson koreografo entzutetsuekin lan egin du. «Asko ikasi nuen haiengandik, esperientzia aberasgarria eta zoragarria izan zen».

Abeslariak eta musikariak ere

Bilbon ez da bakarrik ariko. Jose Valencia, Pepe de Pura eta Jeromo Segura flamenko kantariek lagunduko dute oholtzan. Baita Paco Jarana eta Manuel de la Luz gitarristek ere. Manuel Jose Muñoz Pájaro-k perkusioa joko du, halaber. «Koreografoaren izena aipatzen da beti, baina musikariek ematen diote kolorea eta distira ikuskizunari».

Ordu eta erdi inguru iraungo du emanaldiak, eta tarte horretan De la cava, Encuentro, Espumas del recuerdo, Instrumental, Quiero y no quiero eta Cadencia obren zatiak emango ditu Yerbabuenak. Lan horietan guztietan harengandik asko dagoela adierazi du koreografoak. Baita flamenkoa ulertzeko eta egiteko modu bat baino gehiago ere.

Flamenkorako zaletasun handirik ez duten herrietan ere gustura aritzen dela azaldu du artistak. «Antzokia zapaldu orduko ez dut kontuan hartzen non nagoen, ahaztu egiten dut zein herri den eta zeintzuk ohitura dituen. Antzokian flamenkoa ikusi nahi duen jendea dagoela badakit, sentimenak dituena nik bezala. Ez dute ezer ulertu behar, koreografia ikusteko moduak ez du zertan arrazionala izan. Obra senti dezaten saiatzen naiz, eta hunki daitezen. Ez dut dantzan egiteko era egokitzen Bilbon edo Japonian egoteagatik», esan du Yerbabuenak.

Frantziako Lorraneko Balletak emango dio segida Dantzaldia jaialdiari, maiatzaren 3an. Hiru koreograforen beste horrenbeste pieza aurkeztuko ditu Euskalduna jauregian: William Forsytheren Steptext, Stephen Petronioren Brokenman eta Herve Robberen Les Ombres d'une Guerre Sans Nom. Sarrerak salgai daude dagoeneko.

Dokumentuaren akzioak