Mar del Plata, Argentina. Mar del Platako Denak Bat Euskal Etxeak Aralarko Mikel Deuna zaindariaren eguna ospatu du aurten ere, egitarau zabala lagun, irailean. Besteak beste, zinema, meza, senidetasun-bazkaria eta dantza izan ziren protagonista. Buenos Aires hiriburuko Laurak Bat Euskal Etxean ere ohiturari segituz ospatu dute, kasu honetan joan den larunbatean, urriaren 18an, afari batekin. Bertan, Euskal Etxeko dantzariak ez ziren soilik dantzan fin aritu, baita jatekoa prestatzen ere. Gainera, hitzordua baliatu zuten omenaldi hunkigarria egiteko José M. Gutiérrez txistuaren erreferente argentinarrari.
Mar del Platan, berriz, Mikel Deunaren omenezko jarduerak irailaren 26an, ostiralean, hasi ziren, "El Vasco" (Jabi Elortegi, 2022) filmaren emanaldiarekin, Euskal Etxearen egoitzan. Irailaren 28an, igandea, Beti Alai dantza taldeko kideek Ohorezko Guardia egin zuten Katedralean emandako mezan. Ondoren, dantzari txiki, ertain eta helduek euskal dantzen erakustaldi ederra eskaini zuten plazan, bertaratutakoak loriatuz. Festak Euskal Etxearen egoitzan jarraitu zuen, senidetasun-bazkarian elkarteko lagun eta bazkide ugari batuta.
José M. Gutiérrez, 50 urtez txistulari
Buenos Aireseko ospakizunean, ostera, Laurak Bat-eko dantzariek prestatu zuten afaria eta beraiek izan ziren baita ere zerbitzatu zutenak. Horrez gain, Carolina Ale eta Tomás Cozzi Barquinek zuzendutako taldeak, euren dantzekin girotu zuen ekitaldia. Txikiek ere ikuskizuna eskaini zuten. Baina gaueko unerik hunkigarriena, iritsi zen Euskal Etxeko dantzari eta dantzari ohiek ezusteko Agurra dantzatu ziotenean, zinez sentitua, José M. Gutiérrez laurakbatarrari, txistulari gisa egindako 50 urteko ibilbideagatik. Diasporan euskal musikari egindako ekarpen baliosaren aitortza merezia. Zorionak, Txistulari!
