Europako artista berriak lehiatuko dira ACT jaialdian

ACT Arte Eszenikoen Eskolen Nazioarteko Jaialdia Bilbora eta Barakaldora itzuliko da ekainaren 9tik 13ra, BAI Bizkaiko Antzerki Ikastegiak antolatuta. Jaialdiak Euskal Herriko nahiz Europako herrialdeetako antzerki esperimental eta berritzailea sustatzeko helburua dauka, eta artista berrien obren erakusketa eta lehiaketa uztartzen ditu. Izan ere, antolatzaileek jaialdiko sail nagusi bihurtu dute antzezlan laburren lehiaketa, eta aurtengo irabazleak 3.000 euroko dirusaria eskuratuko du.

Guztira, hemeretzi antzezlan izango dira Laburract izeneko lehiaketan. Bilboko eta Iruñeko antzerki eskoletako ikasleek nahiz ikasle ohiek sei obra taularatuko dituzte. Gainera, Kataluniako, Alemaniako, Erresuma Batuko, Finlandiako, Herbehereetako, Kolonbiako eta Israelgo konpainiek parte hartuko dute lehiaketan. Taldeek genero anitz jorratuko dituzte: happening-a, performance-a, txotxongiloak, dantza, ekintza artea, komeria eta clown, besteak beste. Emanaldiak Bilboko Kafe Antzokian eta La Fundicion aretoan egingo dituzte, ekainaren 10etik aurrera.

Halaber, Marathon programari esker, antolatzaileek eszenografia soileko ikuskizun bat hautatuko dute, Europan barrena aurkezpen bira egin dezan. Hartara, antzezlana honako jaialdi hauetan ikusi ahal izango da: Amsterdameko ITS (Herbehereak), Belgradeko FIST (Serbia), Varsoviako International Theatre Schools Festival (Polonia) eta Pristinako Skena Up (Kosovo).

Iaz abiatutako Dantzine lehiaketak segida izango du baita ere. BAIk bideo sormena sustatu nahi du ekimen horren bitartez, eta irabazleak 1.500 euroko dirusaria jasoko du. Horrenbestez, ikus-entzuleei euren lana helarazteko aukera izango dute bideo, zinema eta dantza sortzaile berriek. Deialdiak harrera ona izan du, eta mundu osoko egileek filmatutako hamasei lanek parte hartuko dute lehiaketan.

Erakusketarekin batera, jaialdiak trebakuntza sustatu nahi du. Gauzak horrela, ikastaro eta hitzaldi sorta prestatu dute. Besteak beste, Jordi Cortes dantzari eta koreografo entzutetsuak bideo sormenari buruzko bi ikastaro teoriko-praktiko emango ditu, ekainaren 11n eta 12an, Barakaldoko antzokian. Bert Waenaar Van Kreveld bat-batekotasunak antzerkigintzan duen eraginari buruz mintzatuko da leku berean, ekainaren 10ean. Gainera, Borja Ruiz eta Josu Montero egileek El arte del actor en el Siglo XX eta Love liburuak aurkeztuko dituzte, hurrenez hurren, ekainaren 13an.

Egile entzutetsuen lanak

Aldi berean, ACTk egile entzutetsuak gonbidatu ditu aurten. Iazko Laburract saileko irabazle Temple Theatre taldeak (Erresuma Batua) jaialdia zabalduko du Out of Chaos antzezlanarekin. Gainera, Clara Van Gool zinemagile eta multimedia artistak bere obren hautaketa bat aurkeztuko du Bilboko Kafe Antzokian, ekainaren 12an. Enter Achilles obrarekin, Emmy saria irabazi eta Oscar sarietarako hautatu zuten Herbehereetan.