Edukira salto egin | Salto egin nabigazioara

Tresna pertsonalak
Hemen zaude: Hasiera Hemeroteka [Bideoa eta galeria] Handiak dira

Dokumentuaren akzioak

[Bideoa eta galeria] Handiak dira

Hunkituta jaso du Kukai Dantzak Errenteria-Oreretak bere ibilbideari egin dion omenaldia. Xabier Olaskoaga plaza lepo, ibilbide artistikoan bidaide izan dituzten hainbat artistek hartu zuten parte omenaldi ekitaldian.
Egilea
Ikerne Zarate
Komunikabidea
Oarsoaldeko Hitza
Tokia
Errenteria-Orereta
Mota
Albistea
Data
2019/03/21
Lotura
Oarsoaldeko Hitza
Kukai Dantzako kideak oholtza gainean atzo.

 

Hunkituta. Hala jaso zuen Kukai Dantzak atzo Errenteria-Oreretak bere ibilbideari eta lortutako sariei egindako aitortza omenaldia. Xabier Olaskoaga plaza, beren laborategi artistikoa den Niessen Kulturgunearen barruan dagoen espazioa, ospakizun eremu bihurtu zen atzokoan dantzari handiei merezitako omenaldia eskaintzeko, eta lepo zegoen ekitaldia hasi aurretik jada. Aurpegi ezagunak oholtza parean: Bingen Zupiria Eusko Jaurlaritzako Kultura Kontseilaria, Denis Itxaso Kultura diputatua, Irene Larraza Etxepare Euskal Institutuko zuzendaria, Julen Mendoza alkatea eta Errenteriako Udalean ordezkaritza duten alderdietako ordezkariak; ezezagunak ere, herritar anonimoak, hamarnaka eta hamarnaka, Kukairen sariak eta lanak neurri txiki batean bada ere, bere sentitzen dituzten errenteriarrak.

Taula gainean izan ziren Kukai Dantzarekin ibilbidea partekatu duten, eta partekatzen duten beste hainbeste artista, eta bakoitzak onena eman zuen beretik, atzoko ekitaldia biribiltzeko. Dantzaz konpainiako kideek hasi zuten ekitaldia, dantzan, nola bestela, eta Iñaki Telleria perkusionistak eta Iñaki Salvador pianistak hartu zieten lekukoa. Ondoren heldu ziren Kukai Dantzako kideak plazara Andoitz Antzizar eta Errenteria Musikaleko trikitilariek lagunduta bildutakoen txalo artean. Ikusle izan ziren batez ere atzokoan, hartzaile, eta oholtza aurrean prestatutako enborretan eserita gozatu zuten herriak prestatu zien aitortzarekin.

Thierry Biscaryk Oreka TXren txalapartaren doinuek lagunduta abestu zien agurra. Dantzaria ere ez zen falta izan, neskato txikiak dantzatu zien dotore. Errenteriako Musika Bandak ez zuen kale egin izan nahi atzoko omenaldian, kalez jantzita, eta terraza bateko aulkietan eserita jo zieten Agurra dantzariei Andra Mari Abesbatzako kide batzuk eta Landarbaso abesbatzak oholtzatik doinua jarri, eta Ereintza Dantza taldeko kideek plazan jendartean dantzaten zieten bitartean. Mireia Gabilondoren hitz ederrak, David Azurza eta Leire Otamendiren kanta eta dantza, eta Kukai Dantzaren garai ezberdinetako argazkiekin osatutako muntaia ere proiektatu zuten atzoko ekitaldian.

“Merezi duzue gaur jasotzen ari zaretena. Zora genuen zuekin, eta heldu da. Zuen ibilbide osoa omentzeko ekitaldia da honakoa”. Julen Mendoza Errenteriako alkateak hartu zuen hitza, eta zoriontzearekin batera, eskerrak eman zizkion Kukai Dantzari. Hunkituta zegoela aitortu zuen, baita Kukaitar sentitzen dela, “hemen dagoen jende asko bezala. Kukaik irabazten duen bakoitzean, ikuskizun berria egiten duenean, gure sentitzen dugu. Hori da zuen meriturik handiena: mundura zabaltzen jakin duzue, herritik eta herriarekin gure herriarekin. Ziurrenik egin duzuen, egiteko duzuen moduarengatik lortu dituzue emaitza horiek guztiak”.

Eskultura Xabier Olaskoaga plazan

Atzotik eskultura du Kukai Dantzak herrian, Xabier Olaskoaga plazan, zehazki.  Juan Manuel Cabadak egindakoa da eskultura hori. Hizkiak dantzan, hori erakusten omen du eskulturak egilearen hitzetan, “hizkiak, dantza munduan hain garrantzitsuak diren besarkada, esku eta oinen ondoan”, azaldu zuen Mendozak, eta gaineratu, eskulturak, Kukai Dantzak Errenteriarekin egiten duena irudikatzen duela: “Zuen esku eta hankak elkar gurutzatzen direnean gure herriarekin ere gurutzatzen dira. Txillidaren antzeko zer edozer dela Kukai Dantza esan zidan norbaitek behin, sustraiak lurrean dituen zuhaitza baina adarrak mundura zabaltzen dituena. Sustraiak lurrean dituzue, gure kulturan, euskal kulturan, baina munduari zabalik. Harrotasuna sentitzen dugu Kukai Dantza gure sustraietan eta gure izate horretan oinarrituta, gizarte moderno baten adierazgarri ere izatea”.

Herritarren mezuak ere jaso zituzten, Torrekuan ari diren Inma Gomez eta Saioa Matxain sortzaileek egindako oihalezko kutxa barruan.

Hunkituta hartu zuen hitza Jon Maya zuzendariak Kukai Dantzaren izenean eta eskerrak eman: “Oholtzara normalean entseatuta heltzen gara, gauzak ondo jakinda, baina gaurkoa deskoloke ederra izan da. Hunkituta gaude, ekitaldiaren beraren planteamenduarengatik eta oholtza gainetik pasa direnak pasa direlako”. Udalari eskerrak eman zizkion, “egungoari zein izan direnei aurretik, urte batzuk badaramagulako hemen eta jende asko pasa delako tartean”.

Madrildik heldu berritan “aje puntu bat” ere bazutela esan zuen Mayak. Herenegun jaso zuten Madrilen Espainiako Dantza Sari Nazionala, saritu eta bi urtera. Hiru aipamen berezi egin zituen, “hiru eskertze erraldoi”, beren ibilbidea posible egin dutelako. Lehen lerroan kokatu zituen Kukai Dantzako kide guztien etxekoak, “dantzariak gara, dantzan jardutea, abentura honetan aritzea badakigu ez dela erabaki erraza. Hemen gaude, guztiok gure etxekoen konfiantza izan dugulako, bidaide ditugun horien aldetik. Hau guztia, zuena da”.

Ereintza Dantza Taldetik sortu ziren, han hasi ziren dantzan Kukai Dantzako guztiak, eta han hezi ziren. Errenterian izatea ez dela kasuala esan zuen, gainera “1980. hamarkadan gizatalde erraldoi bate egin zuen lana, egin zuen apustu, izan ziren kementsuak, ausarta, eta lortu zuten herri honetan dantza testuinguru garrantzitsu bat izatea. Horretatik jaio gara gu, hortik abiatu gara”. Ereintza zoriondu zuen, bereziki 1980 hamarkada horretan aritu zirena, baita ondoren jarraitu dutenak ere, eta erronka ere jarri zien: “Garai horretan testuinguru jakin bat sortu zen bezala eta gu sortu ginen bezala,  etorkizunean ere  sortu daitezela testuinguruak eta horrelako jende gehiago”.

Kukaitar sentitzen diren guztiei eman zizkien azkenik eskerrak, “sentitzen zareten guztiak zaretelako Kukai. denon artean osatutako zerbait da”. Horien barruan, eskerrak eman zizkien bereziki atzoko omenaldian oholtzan bertan, zein pantailan mezu bidez izan ziren eta aritu ziren guztiei “izugarrizko luxua da, luxu pertsonal eta profesionala halako jendearekin bizitza, agertokiak eta orduak pasatzea. Hau zuena da, zuen etxea da”.

Hitzez eginda, hobekien egiten dakiten moduan eman zituzten eskerrak Kukai Dantzako kideek, dantzan. Atzo, berriz ere, profesionalean zein pertsonalean, handiak direla erakutsi zuten.

Dokumentuaren akzioak