Martzillako Dantzariak eta Faltzesko Makaia Dantza Taldea

Kultur 2022ren barruan.

Urtero, abuztuaren 24an, Martzillako dantzak egiten dira Pluko Andre Mariaren eta San Bartolomeren omenez. Bi kalejira egiten dira, agintariena eta prozesiokoa. Gainera, zaindariei eskaintzak egiten zaizkie parrokian, haien egun handian (abuztuaren 5ean eta 24an, hurrenez hurren), eta makil dantza (paloteado), pikoa, arku dantza eta jota dantzatzen dira. Musika Jose Luis Fraile iruindarrak konposatu zuen, eta, dantzetarako, Baztango Mari Cruz Goñi eta Amadeo Arretxearen laguntza izan zuten. Jantziak Marecilla Emakume Elkarteak eginak dira, eta urre koloreko xehetasunak, eskapularioak, kaskabiloak, Andre Mariaren dominak eta espartinak dituzte, besteak beste; horrez gain, Andre Mariaren egunean albaka banatzen da. Pertsonaia ospetsu batek ere parte hartzen du zikloan, bazter nahasleak (zascandil), koloretako trajea eta maskara jantzita; zaku batean, dantza bakoitzean erabiliko diren tresnak daramatza: makilak eta kriskitinak. Koloretako zintak eta kaskabilo handiak dituen makila bat ere badu, dantzariak prozesioan eta dantzetan gidatzeko.