Dokumentuaren akzioak
Igandean abiatuko dira maskaradak Idauze-Menditik
Maskarada
Hamasei urte iragan dira Idauze-Mendiko gazteek azken maskaradak egin zituztenetik. Aurten, talde zinez gaztea osatu dute 30 herritarrek. Halako ohiturarik ez bada ere, igandean meza antolatu dute goizeko 9:00etan herriko elizan, eta ondotik dira abiatuko, auzoz auzo, zazpi barrikadetara.
1999an izan ziren Idauze-Mendiko gazteek egindako azken maskaradak. Tarte horretan, haatik, Pier-Pol Berzaitzek idatzitako Ramuntxo pastorala eman zuten herritarrek, 2003. urtean. Sarritan, beti ere ez esatearren, gertatzen da herri batek maskaradak eta pastorala jarraitutasunean paratu eta eman ditzan, urte batzuk tarte. Herri batek Zuberoako euskal kulturari dion atxikipenaren seinale dira, bata zein bestea. Haatik, bi kultura adierazpen horien gizarte esparrua ezberdina da, zeren eta pastorala adin orotako jendearen bilgune, elkarlan eta emaitza da, eta maskaradak, berriz, gazteriaren kontuko dira.
Ezaugarri hori nabarizkoa da Idauze-Mendikoen kasuan ere, 30 bat joko egileak oso-oso gazteak baitira. Ohargarria geratuko da, halaber, horietarik asko neskak direla, eta aitzindariak dantzarien artean; esaterako, Entseinaria salbu, denak hala dira. Jakina da Zuberoako neskek dutela nolabait dantza jauzien katean etenik ez gertatzea ahalegindu, halako batean mutil gehienak kultura arlotik saihestu baitziren, kirol jarduerak lehenesteagatik batik bat. Urteotan, hala ere, badirudi mutilak dantza tradizionalari berriro arreta jartzen ari direla… Hala, kukuilero edo dantzari gazteenen artean, mistotasun nabariagoa azalduko da Idauze-Mendiko maskarada hauetan.
Ondoko igandeetako agenda horrela finkatua da:
Urtarrilaren 18a, igandea: Idauze-Mendi
Urtarrilaren 25a, igandea: Atharratze
Otsailaren 1a, igandea: Urdiñarbe/Muskildi
Otsailaren 8a, igandea: Garindaine
Otsailaren 15a, igandea: Gamere-Zihiga
Martxoaren 1a, igandea: Altzürükü
Martxoaren 8a, igandea: Ürrüstoi-Larrabile
Martxoaren 14a, larunbata: Maule-Lextarre
Martxoaren 21a, larunbata: Santa Grazi
Martxoaren 28a, larunbata: Zalgize/Iruri
Apirilaren 5a, igandea: Barkoxe
Apirilaren 12a, igandea
Apirilaren 19a, igandea: Idauze-Mendi
Dokumentuaren akzioak
