Eresbil musikaren euskal artxiboa dantzari buruzko materiala ere biltzen hasi da

Dantzadok egitasmoak dantzaren arloan aspaldi atzemandako premia bati erantzuten dio.

Musika arlokoaz gain, dantzari buruzko dokumentazioa ere biltzen hasi da Eresbil musikaren euskal artxiboa, Errenterian (Gipuzkoa) duen egoitzan. Dantzadok egitasmoaren bitartez, dantzaren alorrean zegoen behar bati erantzunez, Eresbilek dantzarekin zerikusia duten liburuak, dokumentuak eta bideoak biltzeari ekin dio, dantzaren inguruko funts bat sortzeko asmotan. Gipuzkoako Foru Aldundiak gidatuta eta Dantzagunearekin lankidetzan jarri du abian Eresbilek Dantzadok, eta, inoiz euskal dantzaren inguruko dokumentazio zentroa sortuko balitz, funtsa zentro horren esku utziko luke.

Kulturaren Euskal Planean eta Kulturen Aldeko Herritar Kontratuan, dantzaren alorreko ordezkariek behin eta berriz aldarrikatu dute euskal dantzaren dokumentazio zentro baten premia, baina erakundeek ez diote oraindik erantzun egokirik eman eskari horri. Funtsa irekita eta kontsultagai dago Eresbilen egoitzan. Dokumentuak jasotzeko bidea ere irekita dago. Eresbilek dantza talde, elkarte, konpainia, jaialdi eta abarrei dei egin die, sortutako material guztia bertara eraman dezaten.

Etengabeko hazkundean

Iazko ekitaldiaren balantzea egin eta ondorengo hilabete eta urteetarako egitasmoak aurkezterakoan eman zuen Jon Baguesek, Eresbileko zuzendariak, dantzari buruzko funtsaren sorreraren berri. Honako hauek dira aurkezpen hartan jakinarazitako datuetako batzuk: gaur egun, orotara, 223.308 dokumentu ditu katalogatuak Eresbilek, eta beste 13.000 gordeak baina oraindik ere katalogatzeko; Euskal Herriarekin zerikusia duten autore eta musika partiturei dagokienez, 644 partitura berri sartu ziren 2014an, eta, horiek aurretik zeudenei gehituta, guztira, 31.516 partitura daude egun; Internet bidezko sarrerek %22eko igoera izan zuten iaz, eta 123.308 izan ziren guztira; Eresbilera bertaratutako erabiltzaileen kopuruak ere nabarmen egin zuen gora; eta Eresbilek 85 soinu artxibo jaso zituen Eusko Jaurlaritzaren Liburuklik liburutegi digitalean.

Soinuzko ondarearen inguruko hiru webgune sortu zituen iaz Eresbilek: Diskogintzaren hastapenak Euskal Herrian; Ybarra sendiaren Funtsa; eta Katalogo diskografikoak (1903-1954). Horrez gain, bi musikagileri buruzko webguneak ere jarri zituen abian: Jesus Guridiri buruzkoa bata, Sara Sotori buruzkoa bestea.

Musikene Euskal Herriko Goi-Mailako Musika Ikastegiarekin sinatutako hitzarmena da Baguesek Eresbilen iazko ekitaldiaren balantzea egitean nabarmendu duen beste kontu bat. Mediatekako baliabide dokumentalak optimizatzeko helburua du, besteak beste, hitzarmen horrek.