'Baga biga higa'-ri buruzko bideo bat babestu du Mikel Laboa katedrak

Laboaren lanen inguruan egiten den hirugarren ikus-entzunezkoa da orain aurkeztutakoa

Laboaren lanen inguruan egiten den hirugarren ikus-entzunezkoa da orain aurkeztutakoa. Proiektuaren helburua Laboaren aurreneko lanen balioa aldarrikatzea da. Juan Gorostidiren ustetan, haiek Laboaren genialtasuna eta haren alde inspiratuena erakusten dute. «Hasieratik argi geneukan Laboaren lehen aro genial hori landu nahi genuela», azaldu zuen.

‘Baga Biga Higa’ bideoan Juan Gorostidik bilatzen zuen hurbilketa fusio bihurtzen da. Kamera, koreografia, irudia, musika eta horren txertaketa erabat batu egiten dira. «Abestiak aukera eman digu soiltasunera jotzeko, inprobisatzeko eta askatasuna izateko. Kameraren lana mugara eraman dugu, dantzariarengandik oso gertu jartzeko eta nolabait berarekin dantza egiteko», azaldu zuen Irati Gorostidik. Dena dela, bideoa ez dago publikoarentzat eskuragarri egongo oraingoz. «Aurretik zinema jaialdietan aurkeztu nahi dugu», esan zuten.