Aurtengo Azeri Dantza inoiz baino jendetsuagoa izango da

Urtero bezala, ganberrokeriak ez dira faltako. Aurten, inoiz baina bikote gehiagok hartuko dute parte. Ereintza Dantza Taldeak ekitaldia herritarrei zabaltzeko asmoan aurten Udalaren babesa jaso du eta inoiz baino herritar gehiago animatu dira jaiei hasiera emango dien ekitaldian parte hartzera. Horrez gain, ibilbidea pixka bat aldatu da eta Herriko Plazara iritsi aurretik Gamon Zumarditik pasatuko dira, non Errenteria Musikaleko ikasleak izango diren bertan.

Bestalde, inauteri guztietan zehar udaletxeko balkoian zintzilik egongo den sardina Azeri Dan-tzan bertan ipiniko dute. Eta jaie hasiera emateko pregoia ere emango dute. Beraz, berrikuntzekin dator aurtengo azeri dantza.

Inauteriei amaiera emateko Sardinaren ehorzketa ospatuko da. Bertan sardina herriko kaleetan erakutsi ondoren (Bittor Idiazabal, Alaberga, Biteri, Xenpelar, Herriko Enparantza, Gamon Zumardia, Avenida de Navarra eta Panier zubia) Oiartzun ibaira botako dute eta horrela Inauteriei amaiera eman. Ereintzako kideez gain desfilea Udal Bandak eta Amulletako danbor joleek lagunduta joango da.

Atzetik sardinari atxekabetuta jarraituko dioten herritarrak ere bertan izango dira eta horretara animatu nahi du jendea Ereintzak. Azkenaldian gorakada nabarmena izan da partehartzean eta honen gorakadarekin jarraitu nahi dute. Iaz bezala Sardinaren ehorzketak azken agurraren ekitaldia Zumardian beharrean Herriko Plazan egingo da eta ohiko bertsoez gain, parodia txiki bat ere egingo da udaletxetik.