Zumarragako ezpata-dantza: Ipuinak dantzaren bidez kontatzen dituen herria

"Zumarragako ezpata-dantza: Ipuinak dantzaren bidez kontatzen dituen herria" dokumentala, Zumarragako Irrintzi dantza taldearen eta Antxiñako Ama txistulari taldearen eskariz egina eta 2017an aurkeztua. Hain zuzen ere, bi taldeen 50. urteurrenean plazaratua. Alde batetik, adituak eta ikerlariak ageri dira ezpata-dantzaren inguruko azalpenak ematen. Andoni Jaka, Jose Antonio Ansorena, Joxe Mari Telleria, Juan Antonio Urbeltz, Oier Araolaza eta Mikel Sarriegik, bakoitzak bere esparrutik, ezpata-dantzaren edo musikaren inguruko informazioa ematen dute: zortzikoaren doinuaren nondik norakoak, ezpata-dantzen sinbologia, Europako ezpata-dantzei lotutako kontuak edota dantzetan emakumeen parte-hartzearen auzia. Eta bestetik, Zumarragako ezpata-dantzariek eta txistulariek Zumarragako ezpata-dantzak ze sentimendu pizten dizkien, Irrintzi dantza taldearen historia edota dantzaren eta taldearen bilakaeraren inguruko testigantzak kontatzen dituzte. Ekoizpena: Gattiken. Zumarragako ezpata-dantza: Ipuinak dantzaren bidez kontatzen dituen herria, 2017.