Altzai-Lakarri: Maskaradak 2025

Urtarrilaren 12arekin hasi dira 2025eko maskaradak, Altzai-Lakarriko gazteek emanak. Goizean zehar sei barrikada egin dituzte: Zunharreta, Altzabeheti, Altzai, Arhane, Sarrikotagaina eta Lakarrin. Lakarriko plazan bukatu dute goizeko saioa Aitzina Pika dantzatuta. Eta arratsaldean ofizioen txanda etorri da. Altzai eta Lakarriko herriak batu eta ia 40 gazte elkartu dira aurtengoan. Dantzari kopuru polita osatu dute; bederatzi aitzindari aritu dira prestaketetan. Dantza irakasle lanetan Marilyn Rekalt eta Jean-Pierre Rekalt ibili dira. Azkenekoz 1998an eman zituzten Altzai-Lakarriko gazteek maskaradak. Aurretik, baita 1991an, 1976an eta 1970ean ere. Martxoak 30 bitarte 12 maskarada emango dituzte. Ohi denez, lehena eta azkena arizaleen herrietan, Lakarrin eta Altzain egingo dituzte eta Zuberoako beste 10 herri bisitatuko dituzte asteburuz asteburu. Irudiak: Idoihia Lahidalga, Amaiur Aristi. Maskaradak, Altzai-Lakarri, 2025-01-12.