Sortutakoak Tradizionala 4ko deialdia irekita

2015/05/15

Gipuzkoako Dantzaguneak Sortutakoak Tradizionala programaren laugarren edizioaren deialdia iragartzen du. Tokian tokiko dantzen edo tradizioz jasotako dantzen berregite, egokitze edo sormen proiektuak babesten ditu deialdi honek. Ekainaren 11 arte aurkeztu ahal izango dira proiektuak eta aukeratutako proiektuak 1.400€ko laguntza jasoko du eta Dantzagunean egonaldi bat egiteko aukera ere izango du.

Beasaingo neskatxen esku-dantza (2012), Andoaingo Axeri-dantzaren soka-dantza (2013) eta Biarritzeko San Martin ezpata-dantza (2014) dira aurreko deialdietan babestutako proiektuak.Epaimahaiaren erabakia ekainaren 29an jakinaraziko da, eta ondoren zehaztuko dira aurkezpenaren nondik norakoak.

Sortutakoak Tradizionala 4

Epeak

Eskaerak bidaltzeko epea: 2015eko maiatzaren 11tik ekainaren 11ra

Epaimahaiaren erabakia: dantza tradizionalaren sektoreko adituz osatutako epaimahai batek proiektu bat aukeratuko du. Hautatutako proiektuen izenak 2015eko ekainaren 29an jakinaraziko dira.

Egonaldiak egiteko epea: 2015a (egonaldia egitea aukerakoa da).

Diru-laguntza

Sortutakoak Tradizionala 4 programan aukeratutako proiektuak 1.400€ko diru-kopurua jasoko du, bere proiektua garatzeko.

Proiektuak

Proiektu bakoitza aurkezteko memoria xehatu bat aurkeztuko da, ondorengo atalak zehatz azalduta: Edukien azalpena, Teknika eta produkzio beharrak, Proiektuko arduradunaren CVa (aurkezten dena taldea bada, taldearen historia).

Informazioa: Sortutakoak Tradizionala 4ko deialdia, oinarriak eta formularioa (Gipuzkoako Dantzagunea)

Gipuzkoako Dantzagunea

Dantzagunea Gipuzkoako Foru Aldundiak dantzaren ikaskuntza eta sorkuntza prozesuak laguntzeko eta sustatzeko sortutako zerbitzua da. Errenterian du egoitza, Niessen eraikinean.

Kulturaren Euskal Planak dantzaren alorreko lan-lerro nagusitzat jo zuen herrialde bakoitzean dantzarako baliabideak izateko erreferentziazko gune bat irekitzea.

Dantzagunean mota guztietako dantzak, bereziki lantzen direlarik dantza klasikoa, garaikidea eta euskal dantza tradizionalean bildutakoak. Bertatik eskeintzen dira Gipuzkoan dantza jardunean ari diren elkarte, konpainia eta eragileei laguntzeko zerbitzuak eta inguruko lurralde eta erkidegoetako antzeko entitate eta zentruekin elkarlana bilatzen da.

Dantzagunearen lan-lerro nagusiak honakoak dira:

1- Sorkuntza koreografikoa sustatzea, sortzaileei eta taldeei Dantzaguneko aretoak utzita, eta egonaldi-programa bat, Sortutakoak, sustatuta.

2- Sorkuntza-prozesuak laguntzea, aholkularitza artistikoaren bitartez; eta dantzaren sorkuntzaren eta produkzioaren inguruko ikerketa garatzea.

3- Prestakuntza espezializatua ematea, gaur egun Gipuzkoan ematen den formazioa osatzeko, alderdi tekniko-praktikoak eta teorikoak landuta.

4- Dantza hedatzeko formula berriak bilatzea, publikoa sentsibilizatzea eta dantza eskola-programetan sartzea.

5- Dantzarekin zerikusia duten gaiei buruzko informazio eta dokumentazio baliabideak interesa dutenen esku jartzea: eskolak, bekak, audizioak, konpainiak, ikuskizunen ekoizpena, hedabiderako kanalak...