Dantza tradizionaleko proiektuentzat diru-laguntzak eskaini ditu Dantzaguneak

2025/08/27

Sortutakoak Tradizionala 11. deialdia egin du Gipuzkoako Dantzaguneak eta urriaren 2 arte irekita izango da proposamenak aurkezteko epea. 3500€ko bi diru-laguntza eskainiko ditu Gipuzkoako Foru Aldundiaren dantza-zerbitzuak euskal dantzaren alorrean proiektuak sortu, garatu eta zabaltzeko. Tradiziozko dantzen sormen edota egokitze proiektuak izan daitezke, testuingurua eta ezaugarriak definitzeko ikerketa- edo dokumentatze-lanak, bai eta dantza irakasteko material pedagogikoa sortzeko eta garatzeko proiektuak ere.

Deialdiaren ezaugarriak

Bi motatako proiektuak aurkeztu daitezke Sortutakoak Tradizionala diru-laguntza deialdira. Batetik, sorkuntza edota ikerketa-lanak, zehazki "tokiko dantzen edo tradizioz jasotako euskal dantzen berregite, egokitze edo sormen proiektuak, edota tokiko dantza tradizionalen testuingurua eta ezaugarriak definitzeko ikerketa edo dokumentatze-lanak." Bestalde, euskal dantza irakasteko material pedagogikoa sortzeko eta garatzeko proiektuak ere aurkeztu daitezke. Proiektuak aurkeztu ditzakete taldeek, elkarteek zein norbanakoek.

Sortutakoak Tradizionala 11 Deialdia (Gipuzkoako Dantzagunea)

Sortutakoak Tradizionalaren emaria

2013. urtean abiatu zenetik hainbat dantza proiektu babestu ditu Gipuzkoako Dantzaguneak Sortutakoako Tradizionala deialdiaren bidez. Hona hemen aurreko deialdietan lagundu diren proiektuen zerrenda.

Aurtzaka: Beasaingo San Joanetako neskatxen esku-dantza (2013)
Axeri-dantza elkartea: Andoaingo Axeri-dantzaren inguruan (2014)
Maritzuli: Miarritzeko San Martin ezpata-dantza (2015)
Duguna: Iruñeko San Juan bezperako soka-dantza (2016)
Iruña taldea: Iruñeko San Lorentzoko ingurutxoa (2017)
Mendi Alde: Otxandioko emakumeen aurreskua (2018)
Duguna: Iruñeko Sanferminetako trokeo-dantzak (2019)
Patxi Montero: Euskal herriko plazetarako dantza berriak (2020)
Iruinkokoa: Iruñeko inauteri euskalduna (2020)
Jon Olazkuaga: La Pamperruque (2022)
Aritz Ibañez: Pausoka Dantzan (2022, 2024)

Gipuzkoako Dantzagunea

Dantzagunea Gipuzkoako Foru Aldundiak dantzaren ikaskuntza eta sorkuntza prozesuak laguntzeko eta sustatzeko sortutako zerbitzua da. Errenterian du egoitza, Niessen eraikinean.

Kulturaren Euskal Planak dantzaren alorreko lan-lerro nagusitzat jo zuen herrialde bakoitzean dantzarako baliabideak izateko erreferentziazko gune bat irekitzea.

Dantzagunean mota guztietako dantzak, bereziki lantzen direlarik dantza klasikoa, garaikidea eta euskal dantza tradizionalean bildutakoak. Bertatik eskeintzen dira Gipuzkoan dantza jardunean ari diren elkarte, konpainia eta eragileei laguntzeko zerbitzuak eta inguruko lurralde eta erkidegoetako antzeko entitate eta zentruekin elkarlana bilatzen da.

Dantzagunearen lan-lerro nagusiak honakoak dira:

1- Sorkuntza koreografikoa sustatzea, sortzaileei eta taldeei Dantzaguneko aretoak utzita, eta egonaldi-programa bat, Sortutakoak, sustatuta.

2- Sorkuntza-prozesuak laguntzea, aholkularitza artistikoaren bitartez; eta dantzaren sorkuntzaren eta produkzioaren inguruko ikerketa garatzea.

3- Prestakuntza espezializatua ematea, gaur egun Gipuzkoan ematen den formazioa osatzeko, alderdi tekniko-praktikoak eta teorikoak landuta.

4- Dantza hedatzeko formula berriak bilatzea, publikoa sentsibilizatzea eta dantza eskola-programetan sartzea.

5- Dantzarekin zerikusia duten gaiei buruzko informazio eta dokumentazio baliabideak interesa dutenen esku jartzea: eskolak, bekak, audizioak, konpainiak, ikuskizunen ekoizpena, hedabiderako kanalak...