Pagolak lehen aldiz eginen dio ongi etorria udaberriari maskaradarekin

‘Dantzan’ elkarteak hurrengo urteko maskaraden egutegiaren berri eman du. Lehen aldiz, Pagolako herritarrek emanen dituzte maskaradak, urtarrilaren 21etik apirilaren 27ra, astebururo. Guzira 15 emanaldi izanen dira eta Pagolaz gain, beste 12 herri bisitatuko dituzte. 

Dantza sustatzea eta hedatzea helburu duen elkarteak adierazi duenez, «historikoki Pagola ez da maskarada eta pastoral tradizio handia izan duen herria». Izan ere, 2019an Domingo Garat pastorala plazaratu zuten herritarrek, kasik 40 urteko hutsunea eta gero: 1982an Pette Basabürü izeneko pastorala prestatu zuten. 

Hala ere, gaur egun hogeita hamar gaztetik goiti elkartu eta estreinakoz maskaradak prestatzen ari dira. Hurrengo urteko maskaraden karguak banatu dituzte eta ostiraletan edo larunbatetan egiten dituzte mustrakak. ‘Dantzan’ elkarteari azaldu diotenez, haien gisara ari dira, «ez da nehor gidari, denek elgarrekin, gazteek, muntatzen eta eramaten dugun proiektua da. Bistan dena, herritar batzuek laguntzen gaituzte beharrean girelarik edo galderak baditugularik».

Egutegi oparoa

Ohitura den moduan, lehen eta azken emanaldiak antolatzaileen herrian izanen dira, Pagolan, beraz; urtarrilaren 21ean eta apirilaren 27an. Urtarrilaren 27an Ezpeizeneko plazan izanen da ere. Otsailean berriz, 4an Irurinen, 11n Maule-Lextarren, 17an Gamere-Zihigan eta 24an Muskildin deskubritzen ahalko da maskarada. 

Martxoa hilabete oparoena izanen da, bost hitzordu izanen baitira: 2an Donaixtin, 10ean Ligi-Athereinen, 17an Idauzen, 23an Alozen eta azkenik, 31n Barkoxen. Apirilean, azken agerraldiaz gain, Larrainen 7an, Urdiñarben 14an eta Lakarri-Altzainen 21ean bilduko dira pagolarrak.