Dantzan igaroko dute igandeko eguna Belauntzan. Izan ere, Belauntzako Udalak dantza festa antolatu du, Donostiako Swing dantza eskolarekin batera. Egun osoko egitaraua prestatu dute, 11:00etatik hasita 22:00ak arte. Bertan, modalitate ezberdinetako dantzak ikasteko aukera izango dute parte hartzaileek; salsa, bachata, bogaloo-cha eta zumba bezalakoak, besteak beste.
Hamar tailer izango dira guztira, eta eguraldiak laguntzen badu, saioak herriko hainbat gunetan egingo dituztela jakinarazi du Iñaki Telleria alkateak. Horiek izango dira pilotalekua, plaza eta udaletxe ondoko parkean dagoen plaza. Swing dantza eskolako irakasleek gidatuko dituzte saioak. Dantzariek indarrak berreskuratu dezaten, food truck gunea ere izango da bertan.
Alkatearen hitzetan, «jendetza espero dugu igandean, Swing ospe handiko dantza eskola baita eta Bizkaia ingurutik jendea etorriko dela jakinarazi digute».
